Agar qaysi filmni ko‘rishni bilmayotgan bo‘lsangiz yoki xato qilmaydigan odamlar bormikan deb o‘ylayotgan bo‘lsangiz, unda ushbu maqola siz uchun.
Ues Anderson
Ues Andersonning har bir filmi san’at asariga o‘xshaydi. “Grand Budapesht mehmonxonasi” kartinasining o‘zi ko‘p narsaga arziydi, unda rejissor o‘ziga xos va betakror uslubni o‘ylab topgan. Uesning barcha ishlari estetika, soddalik va tafsilotlarga e’tiborni birlashtiradi. Hatto ranglar palitrasi ham kino uchun fon emas, balki filmning to‘liq huquqli qahramoniga aylanadi. U yomon film suratga olish nimaligini bilmaydigan rejissorlar ro‘yxatida bo‘lgani ajablanarli emas, albatta.
Alfonso Kuaron
Alfonso Kuaron 1991-yildan 2018-yilgacha sakkizta badiiy filmga rejissorlik qilgan. Ular orasida “Kichik malika” (1995), “Buyuk umidlar” (1998), “Sening onang ham” (2001), “Garri Potter va Azkaban asiri” (2004), “Favn labirinti” (2006), “Insoniyat bolalari” (2006), ”Gravitatsiya” (2013) va boshqa ko‘plab filmlar. Uning barcha filmlari bolalar fantaziyasidan tortib, ilmiy-fantastik dahshatgacha bo‘lgan janrlar kabi turlicha. Va ularning har biri o‘ziga xos tarzda ajoyib.
Deni Vilnyov
Kino olamining maestrosi nomini olgan kanadalik rejissor Deni Vilnyov 1998-yildan 2023-yilgacha 11 ta film suratga olgan. “Dyuna” bu — butun dunyo bo‘ylab ko‘plab mukofot, olqish va muxlislarni to‘plagan uning shoh asari hisoblanadi. Bundan tashqari, Denining filmografiyasida albatta ko‘rib chiqishga arziydigan kartinalar bor — “Tig‘ ustida yuguruvchilar 2049” (2017), “Yong‘inlar” (2010), “Asiralar” (2013), “Yetib kelish” (2016) va boshqa ko‘plab filmlardir. Deni Vilnyov haqli ravishda XXI asrning eng mashhur va iste’dodli rejissorlaridan biri hisoblanadi, u o‘z ishida ajoyib vizual effektlardan foydalanadi.
Pon Jun Xo
Janubiy koreyalik rejissor va ssenarist Pon Jun Xo bir yil ichida to‘rtta mukofotni qo‘lga kiritib, tarixga kirdi. Va bularning barchasi uning “Parazitlar” filmi tufayli. Rejissorning professionalligi oddiy tomoshabinlar ham, tanqidchilar tomonidan ham yuqori baholandi, shuning uchun u yomon filmlarni qanday suratga olishni bilmaydigan ijodkorlar orasida munosib o‘rin egalladi.
Rejissorning ko‘rish kerak bo‘lgan filmlari qatoriga “Hurayotgan it hech qachon tishlamaydi” (2000), “Qotillik xotiralari” (2003), “Dinozavrlar istilosi” (2006), “Ona” (2009), “Qor orqali” (2013) va “Okja” (2017) kiradi. Qayd etish joizki, Pon Jun Xo o‘zining barcha asarlari uchun ssenariylarni o‘zi yozgan! Aytgancha, uning to‘liq metrajli “Mikki-17” filmi 2024-yilda ekranlarga chiqadi. Bosh rollarda Robert Pattinson, Stiven Yon, Toni Kollett va Mark Ruffalo.
Kventin Tarantino
Kvetin Taratinoni deyarli hamma biladi, hech bo‘lmaganda uning filmlari haqida eshitgan, chunki uning bitta bo‘lsa ham filmini bilmaslik mumkin emas. Rejissor 1992-yildan 2019-yilgacha to‘qqizta badiiy film suratga olgan. Aytgancha, Kventin muxlislari o‘ninchi filmning paydo bo‘lishini intiqlik bilan kutishlari mumkinligini aytdi, ammo bu oxirgi film bo‘ladi.
Ayni paytda uning filmografiyasida “Quturgan itlar” (1992), “Jinoiy asar” (1994), “Jeki Braun” (1997), “Billning qotili” (2003), “Billning qotili-2” (2004), “O‘lim isboti” (2007), “Manfur kimsalar” (2009) , “Ozod Jango” (2012), “Jirkanch sakkizlik” (2015) va “Bir paytlar Gollivudda” (2019). So‘nggi film “Kinotanqidchi” deb nomlanadi: voqealar 1977-yilda Los-Anjelesda bo‘lib o‘tadi. Suratga olish ishlari 2023-yilning kuzida boshlanishi kerak. Mazkur film Kventinning rejissorlik faoliyatiga nuqta qo‘yadi.
Akira Kurosava
Rejissor 50 yildan beri faoliyat yuritadi. Bu vaqt ichida Akira 30 dan ortiq filmlarni suratga olishga muvaffaq bo‘ldi, ularning hech biri muvaffaqiyatsiz bo‘lmadi. Bundan tashqari, uning 7 ta asari hali ham IMDb ma'lumotlariga ko‘ra 250 ta eng yaxshi filmlar ro‘yxatida. Yaponiyalik rejissor shu qadar mahoratliki, Federiko Fellini, Jorj Lukas va Andrey Tarkovskiy uning ijodidan ilhom olishgan. Ko‘pgina kino tanqidchilari uning ijodi kino rivojiga ta’sir qilgan deb hisoblashadi.
Kristofer Nolan
Kristofer Nolan 1998-yildan 2023-yilgacha 12 ta film suratga olgan. “Qora ritsar” (2008), “Prestij” (2006), “Interstellar” (2014), “Muqaddima” (2010), “Oppengeymer” (2023), “Qora ritsar: Afsonaning qayta tug‘ilishi” (2012) va boshqa ko‘plab filmlar uchun ssenariylarni Kristoferning o‘zi yozgan. Maʼlumki, rejissor kinoda eng katta hajmdagi tasvirlarni yaratish uchun hamma narsani 70 mm IMAX plyonkasiga suratga oladi. Bu uning har bir kartinasiga alohida ulug‘vorlik beradi.
Martin Skorseze
Albatta, Martin Skorsezesiz ro‘yxat to‘liq bo‘lmaydi. Mohir rejissor 1967-yildan 2023-yilgacha 26 ta badiiy filmga rejissorlik qilgan. Uning filmografiyasidagi deyarli har bir kartina tomoshabinlar va tanqidchilarning alohida e’tiborini qozongan. Ular orasida: “Taksichi” (1976), “Quturgan buqa” (1980), “Nyu-York to‘dalari” (2002), “Murtadlar” (2006), “La’natlanganlar oroli” (2010) va “Uol-stritlik bo‘ri” (2013) filmlari bor.
Bir necha kun oldin, Kann kinofestivalida 2023-yilda uning “Gulli oy qotillari” filmi tanqidchilar va mehmonlar tomonidan yuqori baholandi. Mazkur yangi film Martin Skorseze ssenariysini o‘zi yozgan 7 ta filmdan biridir.
Stenli Kubrik
Ro‘yxatni 1953-yildan 1999-yilgacha 13 ta film suratga olgan Stenli Kubrik yakunlaydi. “Yog‘du”, “Qiziqqon apelsin”, “Keng yumilgan ko‘zlar bilan” — bular hamma ko‘rgan filmlar, lekin ularga qo‘shimcha ravishda rejissorning juda ko‘p sonli chinakam chuqur, ochiq va iste’dodli asarlari bor, ularning har biri alohida e’tiborga loyiqdir. Stenli Kubrik daholigini tushuntirishning iloji yo‘q, uning filmlarini to‘liq his qilish va hech bo‘lmaganda tushunishga harakat qilish uchun (va bir necha marta) tomosha qilish kerak.
Izoh (0)