2024/2025-o‘quv yili uchun respublika oliy taʼlim muassasalarining magistratura mutaxassisliklariga qo‘shimcha qabul qilish uchun ruxsat berildi. Bu haqda Oliy taʼlim, fan va innovatsiyalar vazirligi xabar qildi.
Maʼlum qilinishicha, qabul jarayonida talab darajasidagi xorijiy til sertifikatiga ega bo‘lib, qabul kvotasi doirasida talabalikka tavsiya etilmagan talabgorlarni OTMlar tomonidan belgilanadigan kontrakt miqdorining 2 baravaridan ortiq bo‘lmagan miqdordagi to‘lov-kontrakt asosida qabul qilishga ruxsat berilgan.
“Qo‘shimcha qabul asosida o‘qish istagini bildirgan talabgorlar bevosita oliy taʼlim muassasasi qabul komissiyasiga murojaat qilishlari so‘raladi”, deyiladi xabarda.
2022/2023-o‘quv yilidan boshlab magistraturaga qabul abituriyentning bakalavriat diplom bali o‘rtacha ko‘rsatkichi hamda xorijiy tilni bilish darajasi bo‘yicha tegishli milliy yoki xalqaro sertifikat bali asosida, ballar ketma-ketligiga qat’iy rioya qilgan holda amalga oshiriladi. Qo‘shimcha imtihon o‘tkazilmaydi.
Eslatib o‘tamiz, may oyida magistratura va doktoranturaga ayrim yo‘nalishlarda xorijiy til bilish sertifikati darajasi pasaytirilgan edi.
Izoh (0)