Kuni kecha Oila va xotin-qizlar qo‘mitasida Yangi O‘zbekiston universitetining bir guruh a’lochi, ijtimoy faol talaba qizlarining qo‘mita raisi bilan yuzma-yuz muloqoti bo‘lib o‘tdi.
Muloqot davomida talabalar Oila va xotin-qizlar qo‘mitasi hamda uning hududiy bo‘linmalari tomonidan amalga oshirilayotgan ishlar, ayniqsa, xotin-qizlarning ijtimoiy-siyosiy faolligini oshirish, ularni oliy ta’limga qamrab olish, ehtiyojmand oilalarning qizlariga davlat tomonidan yaratilgan imtiyozlarning amaliy natijalari, ayollar bandligini ta’minlash borasida amalga oshirilayotgan ishlarga qiziqish bildirib, savollariga javob oldilar.
Qo‘mita raisi O.Parpiboyeva tomonidan ta’kidlanganidek, keyingi yillarda mamlakat hayotining barcha jabhalarida xotin-qizlar faolligini oshirish, ularning ta’lim va kasbiy ko‘nikmalar olishi hamda bandligini ta’minlashga har tomonlama ko‘maklashish, tadbirkorlik tashabbuslarini yanada qo‘llab-quvvatlash, bir so‘z bilan aytganda, ayolning chinakam baxtli yashashi uchun, intellektual va ma’naviy yuksalishi, kasbiy hamda oilaviy majburiyatlarni uyg‘un tarzda bajarishi kabi imkoniyatlar yo‘lida keng qamrovli davlat siyosati amalga oshirilmoqda.
Xotin-qizlarning ijtimoiy-siyosiy faolligini oshirish yo‘nalishida e’tirofga molik o‘zgarishlar yuz berdi. Jumladan, shahar, tuman hokimi, vazir, elchi kabi mas’uliyatli lavozimlarga ayollar tayinlandi. Ayollarning boshqaruv sohalaridagi ulushi 33 foizga, tadbirkorlik sohasida 35 foizga, siyosiy partiyalarda 44 foizga, oliy ta’limda 47 foizga yetdi.
Ayollarning sohalardagi ulushi ham ortdi. Ular tibbiyot tizimida 77 foizdan ko‘proqni, ta’lim sohasida salkam 74 foiz, savdoda 49 foiz, iqtisodiyot tarmoqlari, sanoat va ishlab chiqarishda qariyb 46 foiz, madaniyat va sportda 45 foiz, qishloq xo‘jaligida 42 foizdan ziyodni, moliya va sug‘urta faoliyatida 37 foizdan ortiqni, axborot va aloqa xizmatida 35 foiz, professional, ilmiy va texnik faoliyatda qariyb 34 foizni, davlat boshqaruvi va mudofaa tizimida 27 foizdan ko‘proqni tashkil etmoqda.
Ijtimoiy, iqtisodiy va siyosiy sohalarda xotin-qizlar hamda erkaklar uchun teng huquq va imkoniyatlar ta’minlash maqsadida mamlakatimizda qabul qilinayotgan har bir normativ-huquqiy hujjat loyihasini gender huquqiy ekspertizasidan o‘tkazish yo‘lga qo‘yildi. Jahon bankining Ayollar, biznes va qonun indeksida O‘zbekiston xotin-qizlar huquqlari va gender tenglik bo‘yicha ahamiyatga molik islohotlarni amalga oshirgan davlatlar qatoriga kiritildi.
Har yili ehtiyojmand oilalar farzandi bo‘lgan xotin-qizlar davlat granti (2000 ta kvota) asosida oliy ta’lim muassasalarga o‘qishga qabul qilib kelinmoqda.
Mutaxassisligi bo‘yicha kamida 5 yil mehnat stajiga, lekin oliy ma’lumotga ega bo‘lmagan 500 nafar xotin-qiz har yili Oila va xotin-qizlar davlat qo‘mitasi tavsiyanomalariga asosan davlat OTMlariga test sinovlari natijalariga muvofiq kontrakt asosida o‘qishga qabul qilinmoqda.
Davlat oliy ta’lim muassasalarining magistratura bosqichida o‘qiyotgan barcha xotin-qizlarning kontrakt to‘lovlari qoplab berilishi va bunga har yili kamida davlat byudjetidan 200 milliard so‘m ajratib borilmoqda.
Oliy ta’lim muassasalari, texnikum va kollejlarda, sirtqi va kechki ta’limda o‘qiyotgan xotin-qizlar kontraktlarini to‘lash uchun 7 yilga foizsiz kredit berish tizimi joriy etildi.
Muhtoj yolg‘iz ayollar va boquvchisini yo‘qotgan qizlarning oliy ta’limdagi kontrakt-to‘lovlari qoplab berilmoqda.
Davlat ilmiy tashkilotlari yoki oliy ta’lim muassasalari doktoranturasiga faqat xotin-qizlar uchun har yili 300 tadan maqsadli kvota ajratib borilmoqda.
Mamlakatimizda xotin-qizlar uchun yaratilgan bu kabi imtiyozlar va qo‘lga kiritilayotgan yutuqlar qamrovi juda keng. Biroq yangi davr Oila va xotin-qizlar qo‘mitasi oldiga ham o‘ta muhim zalvorli vazifalar qo‘ymoqda.
O‘zbekiston Respublikasi prezidentining 2023 yil 21 dekabrdagi “Oila va xotin-qizlar qo‘mitasining faoliyatini takomillashtirishga oid qo‘shimcha chora-tadbirlar to‘g‘risida” gi 208-son farmoni hamda “Oilalarni mustahkamlash va xotin-qizlarning faolligini oshirish bo‘yicha qo‘shimcha chora-tadbirlar to‘g‘risida”gi 401-son qarori muhim voqelik bo‘ldi. Shuning bilan birga, qo‘mita oldiga o‘ta muhim vakolat va mas’uliyatli vazifalar belgilab berildi.
Qo‘mita tomonidan rejalashtirilgan joriy maqsad va vazifalar ham talabalar tomonidan qiziqish bilan qabul qilindi.
Uchrashuv so‘ngida talabalarning qo‘mita va uning hududiy tuzilmalarida, qolaversa, mahallalarda volontyor sifatida hamkorlik qilishi bo‘yicha takliflar muhokama qilindi.
Izoh (0)