Sovrin jamg‘armasi 5,4 milliard so‘m bo‘lgan “Zakovat” intellektual olimpiadasi o‘tkazilmoqda.
Intellektual olimpiada oliy taʼlim tashkilotlarining bakalavriat va magistratura bosqichida taʼlim olayotgan talabalar o‘rtasida, ikki bosqichda, hududiy saralash va respublika bosqichida o‘tkazilmoqda. 25-noyabr kuni respublikaning barcha hududlarida Oliy taʼlim muassasalari talabalari o‘rtasidagi intellektual olimpiadaning hududiy saralash bosqichi o‘tkazildi.
Musobaqaning hududiy bosqichida respublikadagi 135 ta OTM jamoalari hamda 1080 nafar talaba ishtirok etib, ulardan eng kuchli 50 ta OTM hamda 550 nafar talaba turnirning final bosqichiga yo‘l oldi. Intellektual olimpiadaning respublika bosqichi Toshkent shahrida joriy yilning 17-dekabr kuni start oldi va 20-dekabrga qadar davom etadi.
Respublika bosqichida OTMlar jamoalari 6 ta yo‘nalishda — “Zakovat”, “Breyn-ring”, “Erudit-kvartet”, “Shaxsiy o‘yin”, shaxmat va shashka o‘yinlari bo‘yicha bellashuv olib boradi. Har bir oliy taʼlim muassasasidan intellektual olimpiadada 11 nafar talaba ishtirok etishmoqda.
Turnirning jami sovrin jamg‘armasi 5 milliard 400 million so‘mni tashkil etadi. Shundan 4,5 milliard so‘m Prezident sovg‘asi sifatida umumjamoa hisobida 1, 2 va 3-o‘rinlarni egallagan oliy taʼlim muassasasiga (aynan taʼlim muassasasining o‘ziga) topshiriladi (1-o‘rin — 2 milliard so‘m; 2-o‘rin — 1,5 milliard so‘m; 3-o‘rin — 1 milliard so‘m). 900 million so‘m esa g‘olib jamoalar aʼzolari o‘rtasida taqsimlanadi. O‘yinning 1- va 2-turidan keyingi natijalar eʼlon qilindi.
Izoh (0)