O‘zbekistonlik talabalar xalqaro matematika olimpiadasida jami 57 ta medalni qo‘lga kiritdi. Bu haqda Oliy ta’lim, fan va innovatsiyalar vazirligi xabar berdi.
Unga ko‘ra, joriy yil 3–8-mart kunlari Turkmaniston Ta’lim vazirligi tashabbusi bilan Ashxobod shahridagi Xalqaro gumanitar fanlar va taraqqiyot universitetida oliy ta’lim muassasalari talabalari o‘rtasida an’anaviy IV xalqaro ochiq matematika olimpiadasi (OMOUS-2024) bo‘lib o‘tdi.
Unda O‘zbekiston, Rossiya, Saudiya Arabistoni, Ispaniya, Xitoy, Bolgariya, Indoneziya va mezbon Turkmaniston oliy ta’lim muassasalarining jami 500 nafardan ziyod talabasi qatnashdi. Shu jumladan, O‘zbekistonning 18 ta oliy o‘quv yurtidan 79 nafar talaba ishtirok etdi.
Musobaqalar matematikaga qiziquvchi bakalavr va magistratura bosqichidagi talabalar o‘rtasida yakka va jamoaviy turlarda o‘tkazildi. Olimpiadaning rasmiy tili — turkman va ingliz tillari bo‘ldi. O‘zbekiston sharafini himoya qilgan talabalar olimpiada dasturida nazarda tutilgan yakkalik va jamoaviy bahslarda o‘zaro bilimlarini sinab, umumiy hisobda 7 ta oltin, 15 ta kumush va 35 ta bronza bilan 3-o‘rinni qo‘lga kiritdi.
Izoh (0)