Sherzodjon Polvonov 10-oktyabr kuni Farg‘ona viloyati hokimi o‘rinbosari etib tayinlandi. Bu haqda viloyat hokimligi matbuot xizmati xabar berdi.
U Farg‘ona viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari bo‘ldi.
Tayinlovga qadar O‘zbekiston Mahallalari uyushmasining mahallalar obodligini ta’minlash va ma’naviy-ma’rifiy ishlarni tashkil etish boshqarmasi boshlig‘i vazifasida ishlab kelgan.
Sherzodjon Polvonov 1987-yilda Rishton tumanida tug‘ilgan. Farg‘ona politexnika instituti hamda Rossiya xalq xo‘jaligi va davlat boshqaruvi akademiyasi (magistratura)ni tamomlagan. Mehnat faoliyatini 2009-yilda Farg‘ona viloyati hokimligi huzuridagi kommunal xizmat ko‘rsatish departamenti bosh mutaxassisi sifatida boshlagan. Viloyat hokimligi yetakchi mutaxassisi, “Kamolot” yoshlar ijtimoiy harakati Farg‘ona shahar kengashi raisi bo‘lgan.
2015—2017-yillarda “Kamolot” yoshlar ijtimoiy harakati Farg‘ona viloyati Kengashi raisi, O‘zbekiston yoshlar ittifoqi Markaziy kengashi bo‘lim mudiri, Farg‘ona shahar hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari, O‘zbekistonning Novosibirsk shahridagi Bosh konsulxonasi xodimi, 2020—2024-yillarda O‘zbekiston Tashqi mehnat migratsiya agentligining Rossiyaning Novosibirsk shahridagi vakolatxonasi rahbari bo‘lib ishlagan. “Shuhrat” medali sohibi.
2024-yilning mart oyidan Farg‘ona viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari bo‘lib ishlab kelgan Sherzod Rahimov o‘z arizasiga ko‘ra lavozimidan ozod etildi.
Izoh (0)