Super yarim o‘rta vazn toifasida sobiq WBA chempioni Isroil Madrimov ikkinchi eng yengil vaznda sobiq jahon chempioni Murodjon Ahmadaliyev hamda amaldagi chempion Naoya Inoue jangi haqida fikr bildirdi. Bu haqida O‘zbekiston professional boks assotsiatsiyasi matbuot xizmati ma’lum qildi.
“Inoue qochyapti. U biladi, bu vaznda Murodjon eng qiyin raqib va biz ko‘rib turibmiz-ki, Murodjon Ahmadaliyev uni bemalol yuta oladi. Shu boisdan ham u boshqa raqiblarni tanlayapti. Jangdan ochiqchasiga qochyapti, desak ham bo‘ladi. Chunki kamar hozir unda. Vaziyat qanday bo‘lishini endi ko‘ramiz.
Murodjon Ahmadaliyev yana o‘z mavqeini tiklab, O‘zbekistonga kamarlarni olib kelishiga ishonamiz. Bu biroz keyinroq bo‘lishi mumkin. Sababi, Inoue qochyapti. Qachonki, Naoya ketmasdan, barcha kamarlarini himoya qilsa, Murodjon Ahmadaliyev undan barcha titullarini tortib olishi mumkin”, — dedi Isroil Madrimov.
Avvalroq, Matchroom promouterlik kompaniyasi rahbari Eddi Hirn WBA’ning Naoya Inoue va Murodjon Ahmadaliyev jangi uchun yana bir bor buyruq bergani haqida aytib o‘tgandi.
Ma’lumot uchun, 31 yoshli yaponiyalik Naoya Inoue ayni paytda ikkinchi eng yengil vazn toifasida WBA, WBC, WBO hamda IBF kamarlari sohibi hisoblanadi. Murodjon Ahmadaliyev esa uning WBA kamari uchun majburiy da’vogar bo‘lib turibdi.
Ahmadaliyev 2023-yilning dekabr oyida Kevin Gonsalesga qarshi jang qilgandi. Qarama-qarshilikning 8-raundida o‘zbekistonlik bokchi raqibini texnik nokautga uchratib, g‘alaba qozongan edi.
Naoya 9-sentyabr kuni mutlaq jahon chempionligi unvonini himoya qildi. Tokioda bo‘lib o‘tgan boks oqshomida yaponiyalik sportchi Ti Jey Doeniga qarshi jang qilib, yettinchi raundda uni nokautga uchratdi. Inouening zarbasidan so‘ng Doeni jangni davom ettirolmasligi ma’lum bo‘ldi.
Izoh (0)