Respublikachilar partiyasidan prezidentlikka nomzod Donald Tramp raqibi Kamala Harris bilan o‘tkazilishi kerak bo‘lgan ikkinchi teledebatda ishtirok etmasligini ma’lum qildi.
Truth Social tarmog‘ida qoldirgan postida Tramp Harrisni go‘yoki “jangda mag‘lub bo‘lgan” hamda “revansh jangini xohlayotgan” bokschiga qiyoslagan.
“So‘rovlar shuni yaqqol ko‘rsatmoqdaki, men radikal so‘l demokrat nomzod Kamala Harrisga qarshi bahsda g‘alaba qozondim”, deydi Tramp.
O‘z postida respublikachi AQSHning amaldagi prezidenti Jo Bayden va amaldagi vitse-prezident Harrisni mamlakatni “vayron qilganlikda” ayblagan. Tramp, shuningdek, “millionlab jinoyatchilar va ruhiy kasallar Qo‘shma Shtatlarga butunlay nazoratsiz kirib kelgani, inflyatsiya esa mamlakat o‘rta sinfini vayron qilgani”ni ta’kidlagan.
“Uchinchi bahs bo‘lmaydi!”, deya xulosa qilgan u birinchi munozarani Harris foydasiga saylovdan voz kechguncha demokrat nomzod bo‘lgan Bayden bilan o‘tkazganini eslatgan holda.
Kamala Harris, Trampning postidan ko‘p o‘tmay mitingda so‘zga chiqib, “saylovchilar oldida yana bir munozara o‘tkazish majburiyati mavjud”ligini ma’lum qilgan.
Tramp va Harris o‘rtasidagi ilk debat 10-sentyabr kuni ABC telekanalida jonli efirda bo‘lib o‘tdi. Ularni 67 milliondan ortiq kishi tomosha qilgan. Munozaradan keyingi so‘rovlar Harrisning kam farq bilan g‘alaba qozonganini ko‘rsatgan. Tahlilchilarga ko‘ra, bu noyabrdagi saylov natijalariga qanday ta’sir qilishi hozircha aniq emas.
Izoh (0)