Kanada Birlashgan Millatlar Tashkilotining falastinlik qochqinlar bo‘yicha agentligini (UNRWA) moliyalashtirishni qayta tiklaydi. Mazkur moliyalashtirish avvalroq agentlik xodimlari va Falastinning HAMAS harakati o‘rtasidagi aloqalar haqidagi shubhalar tufayli to‘xtatilgan edi. Bu haqda Kanada xalqaro taraqqiyot vaziri Ahmad Hussen bayonotiga tayanib, “RIA Novosti” xabar berdi.
Vazirning ta’kidlashicha, Ottava BMTning rasmiy tekshiruvi hali yakunlanmaganiga qaramay, UNRWA mas’uliyat, nazorat va oshkoralikni kuchaytirish bo‘yicha choralar ko‘rgan, deb hisoblaydi.
Kanada BMTning boshqa donorlari va UNRWA bilan hamkorlikda davom etayotgan tergov va tashkilot faoliyatining mustaqil tahlili natijasida kelib chiqadigan tavsiyalarning to‘liq bajarilishini ta’minlashga intiladi, — dedi Hussen.
Avvalroq Kanada bosh vaziri Jastin Tryudo UNRWA’ni moliyalashtirishni qayta tiklash imkoniyatini izohlar ekan, hukumati BMT tergovining borishini diqqat bilan kuzatayotganini aytgan edi. 7-oktyabr kuni Isroilga qilingan hujumga UNRWA agentligi xodimlarining aloqadorligi haqida xabar tarqalgan edi. Ushbu jangchilar soni va ularning hujumga aloqadorlik darajasi haqida xabar berilmagan.
Tashkilot rahbari Filippo Lazzarinining aytishicha, Isroilga hujumda gumon qilingan agentlik xodimlari aybi isbotlangan taqdirda sudga tortiladi. Biroq Finlyandiya, Buyuk Britaniya, Italiya, Avstraliya, Germaniya, Shvetsiya, Yaponiya va boshqa qator davlatlar tashkilotni moliyalashtirishni to‘xtatganini allaqachon e’lon qilgan.
Izoh (0)