Afg‘oniston Vazirlar Mahkamasi raisi Muhammad Hasan Oxund Turkmaniston—Afg‘oniston—Pokiston—Hindiston (TAPI) gaz quvuri loyihasini amalga oshirish bo‘yicha ishlar yaqin orada tiklanishi haqida ma’lum qildi. Bu haqda “Report.az” xabar berdi.
Ma’lum bo‘lishicha, Afg‘oniston bosh vaziri Turkmaniston prezidenti Serdar Berdimuhamedovga hayit munosabati bilan yo‘llagan tabrik telegrammasida mazkur mavzuga urg‘u bergan.
Shuningdek, maktubda Afg‘oniston Turkmaniston bilan siyosiy va iqtisodiy munosabatlardagi so‘nggi yutuqlarni yuksak qadrlashi va hamkorlikni yanada rivojlantirishni intiqlik bilan kutishi ta’kidlangan.
Fursatdan foydalanib, Turkmaniston—Afg‘oniston—Pokiston—Hindiston gaz quvuri loyihasi bo‘yicha ishlar tez orada tiklanishi kutilayotganini ta’kidlamoqchiman, — deyiladi maktubda.
Yiliga 33 milliard kub metr tabiiy gaz o‘tkazish quvvatiga ega, uzunligi 1,8 ming kilometrdan ortiq bo‘lgan TAPI gaz quvurining qurilishi 2015-yilda boshlangan. Ayni paytda “Turkmangaz” davlat konserni gaz quvurining Turkmaniston hududidan o‘tuvchi 214 kilometrlik uchastkasini qurish ishlarini yakunlab, foydalanishga to‘liq tayyorlab qo‘ygan.
Turkmaniston matbuotining xabar berishicha, ayni paytda Hirot viloyatidagi sanoat korxonalari va xususiy uy xo‘jaliklarini tabiiy gaz bilan ta’minlashga mo‘ljallangan TAPI gaz quvurining Afg‘oniston hududidagi 150 kilometrlik uchastkasini qurish bo‘yicha ishlar olib borilmoqda.
Izoh (0)