Tailandning Phuket orolida budda rohibi Vat Khao Rung ibodatxonasida o‘z hamkasbini otib o‘ldirdi. Bu haqda Bangkok Post xabar bermoqda.
Ma’lum qilinishicha, fojia 29-iyun kuni tongotar paytda sodir bo‘lgan. 47 yoshli rohib Phra Charyak 36 yoshli Phra Naritani monastir turar joy binosining hojatxonasida o‘ldirgan. Qurbonning tanasida to‘rtta o‘q jarohati topilgan. Jinoyat joyidan politsiya 38 kalibrli revolverning to‘rtta gilzasi va o‘q joylash moslamasini topgan.
Gumonlanuvchi o‘z hujrasiga yashirinishga uringan, biroq politsiya binoni o‘rab olganidan so‘ng taslim bo‘lgan. Tintuv paytida undan o‘qlangan revolver va 14 ta o‘q musodara qilingan. So‘roq chog‘ida rohib qotillikni tan olgan va buni marhum uni doimiy ravishda ta’qib qilgani hamda kamsitgani bilan izohlagan. Gumonlanuvchining aytishicha, so‘nggi tomchi tongotarda hojatxonada jabrlanuvchining xatti-harakati bo‘lgan.
Ta’kidlanishicha, hodisa Tailandda qurol to‘g‘risidagi qat’iy qonunlarga qaramay sodir bo‘lgan. Fuqarolar 38 kalibrgacha bo‘lgan revolverlarni qonuniy ravishda sotib olishlari mumkin bo‘lsa-da, mamlakatda bunday jinoyatlar kamdan-kam uchraydi.
Tailand Ichki ishlar vazirligining statistik ma’lumotlariga ko‘ra, har yili taxminan 2,5-2,8 ming kishi o‘q jarohatlari tufayli halok bo‘ladi, ammo aksariyat holatlar jinoyatchi guruhlar o‘rtasidagi to‘qnashuvlar bilan bog‘liq.
Qayd etilishicha, bu voqea so‘nggi yillarda budda rohibining bunday shafqatsiz jinoyat sodir etgan kam sonli holatlardan biri bo‘lgan. Mahalliy hokimiyat diniy muassasalarda xavfsizlikni tekshirishni boshlagan.
Bundan avval Braziliyada ikki yoshli bola otasining qurolini o‘ynab, tasodifan onasiga o‘q uzishi oqibatida 27 yoshli Debora Rodriges vafot etgandi.
Izoh (0)