Qirg‘iziston Milliy xavfsizlik davlat qo‘mitasi rahbari Qamchibek Tashiyev idora xodimlari va boshqa davlat xizmatchilarini farzandlari hamda qarindoshlarining topshiriqlarini bajarmaslikka chaqirdi. Bu haqda 24.kg xabar berdi.
Tashiyev davlat xizmatchilaridan birortasi uning yaqinlari bilan aloqaga chiqsa, ularga nisbatan xizmat tekshiruvi o‘tkazilishidan ogohlantirdi.
Agar mening yaqinlarim, farzandlarim bilan telefonda gaplashsangiz ham, javobgarlikka tortilasiz. Ularning iltimoslarini, topshiriqlarini bajarishga majbur emassiz. Agar kimdir yaqinlarim bilan yashirincha gaplashadigan, ular bilan uchrashadigan bo‘lsa va men buni bilib qolsam, xizmat tekshiruvi o‘tkazamiz.
Buni yodda tuting. Men hech qachon shaxsiy muammolarimga o‘z lavozimim hisobidan yechim topmayman. Hech qachon yaqinlarimning muammolarini hal qilish bo‘yicha topshiriq bermaganman va bermayman, dedi Qamchibek Tashiyev.
U Qirg‘izistonda oldingi hokimiyat davrida oilaviy-urug‘chilik boshqaruvi mavjud bo‘lganini eslatib o‘tdi. Mamlakat rahbariyatining qarindoshlari davlat ishlariga aralashgan edi va bundan keyin bunday holat takrorlanmasligi kerak, degan u.
Izoh (0)