Gulbakhor Airways tomonidan umra tadbirlarini tashkil etish va o‘tkazishda ziyoratchilarga noqulaylik yuzaga kelgani bo‘yicha xabarlar tarqaldi. Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasi holat yuzasidan munosabat bildirdi.
Turizm qo‘mitasi tomonidan mazkur holat yuzasidan tegishli qonuniy choralar ko‘rilmoqda. Hozirgi vaqtda ziyoratchilar mehmonxonaga joylashtirilgan. Vazirlar Mahkamasining 2023-yil 8-avgustdagi “Umra tadbirlarini tashkil etish va o‘tkazishda ziyoratchilarning manfaatlarini samarali himoya qilish bo‘yicha qo‘shimcha chora-tadbirlar to‘g‘risida” gi 345-sonli qaroriga muvofiq, turistik faoliyatni amalga oshirish litsenziyasi chiqish turizmi kichik turining umra xizmatlarini ko‘rsatish faoliyati bo‘yicha 100 ming AQSH dollari ekvivalentidan kam bo‘lmagan miqdordagi mablag‘larni Turizm qo‘mitasining Xavfsiz turizm jamg‘armasiga zaxira qilib qo‘yish hamda ushbu mablag‘larning yetarli miqdorini taʼminlab borilishi belgilangan.
Mazkur qarorga muvofiq, tegishli turoperator tomonidan Turizm qo‘mitasining Xavfsiz turizm jamg‘armasiga zaxira qilib qo‘yiladigan 100 ming AQSH dollari ekvivalenti miqdoridagi mablag‘lardan uning umra xizmatlarini sifatsiz ko‘rsatishidan jabr ko‘rgan ziyoratchilarga yetkazilgan moddiy va maʼnaviy zarar o‘rnini qoplash uchun sud qaroriga muvofiq foydalanilishi belgilangan.
Shuningdek, umra xizmatlarini ko‘rsatish bilan bog‘liq faoliyat ustidan jamoatchilik nazoratini kuchaytirish maqsadida Turizm qo‘mitasi o‘z rasmiy veb-saytida umra xizmatlarini ko‘rsatuvchi turoperatorlar reytingini shakllantirish uchun tegishli axborot modulining ishga tushirilgani va mahalliy turoperator jamoatchilik tomonidan berilgan ovozlarga ko‘ra reytingi aniqlanmoqda.
Litsenziyaga ega bo‘lmay umra tadbirlarini tashkil etish bilan shug‘ullanayotgan 23 ta tadbirkorlik subyektlariga kamchiliklarni bartaraf etish bo‘yicha muddatlar belgilanib, ko‘rsatmalar berildi.
Belgilangan muddatlarda kamchiliklarni bartaraf etmagan “Orzu Travel” MCHJ, “Lastochka-Planeta” MCHJ, “Premier Wanderlust” MCHJ, “Bobissalam-Travel” MCHJ, “Muslim-Tour MT” MCHJ, “Delta Smart Project” MCHJlarning “chiqish turizmi” faoliyati bilan shug‘ullanishga asos bo‘lgan litsenziyalari Toshkent shahar Turizm boshqarmasining qarorlari bilan amaldagi qonunchilikka asosan 10 kun muddatga to‘xtatilgan bo‘lsa “MG Tur” MCHJning litsenziyasi bekor qilindi.
Izoh (0)