Rejissyor Denni Boyl tomonidan suratga olingan post-apokalipsis va zombilar haqidagi “28 yil o‘tib” nomli qo‘rqinchli film iPhone 15 Pro Max’da suratga olingani ma’lum bo‘ldi. Byudjeti 75 million dollar bo‘lgan mazkur film smartfonda suratga olingan kino tarixidagi eng qimmat loyihaga aylanadi.
Suratga olish ishlarining asosiy qismi avgust oyining oxirida yakunlandi. Rejissyor Denni Boyl operator Entoni Dod Mentl bilan birgalikda kartina ustida ish olib bormoqda. Ular 2009-yilda “Xarobadan chiqqan millioner” filmi uchun “Oskar”ni qo‘lga kiritgan edi.
Avvaliga “28 yil o‘tib” filmi smartfonlarda suratga olingani barchadan sir tutildi. Hatto ijodiy guruhdan ushbu tafsilotni oshkor qilmaslik to‘g‘risida shartnomalar imzolandi. Biroq paparatssilar telefon solingan maxsus quti hamda unga o‘rnatilgan katta obyektivni tasvirga olishga muvaffaq bo‘ldi.
Ekspertlar bu nimani anglatishini darhol tushundi va xabar butun dunyo OAVda tarqala boshladi. Filmda ishtirok etayotgan bir nechta shaxslar ushbu ma’lumotni WIRED nashriga tasdiqladi.
“28 yil o‘tib” filmi nostandart va kutilmagan texnologiyalardan foydalanilgan yoki smartfonda suratga olingan birinchi yirik loyiha emas. 2002-yilda Denni Boyl va kinematograf Entoni Dod Mentl tomonidan “28 kun o‘tib” filmi o‘sha davr uchun eng yuqori texnologiyali bo‘lgan Canon XL-1 kamerasida suratga olingan.
Film premyerasi 2025-yil 20-iyunda bo‘lib o‘tishi rejalashtirilgan. “28 yil o‘tib” filmi “28 kun o‘tib” (2002) va “28 hafta o‘tib” (2007) nomli zombilar haqidagi dahshatli janrdagi filmlarning mantiqiy davomidir. Birinchi qismda bosh rolni ijro etgan aktyor Killian Myorfi trikvelda ham ishtirok etadi.
Izoh (0)