Argentina futbol assotsiatsiyasi futbol bo‘yicha Olimpiada musobaqasida Marokashga qarshi o‘yindagi bahsli vaziyatdan so‘ng FIFA’ga shikoyat qildi.
“Argentina futbol assotsiatsiyasi bugun U-23 terma jamoamizning marokashlik futbolchilarga qarshi o‘yinida sodir bo‘lgan barchaga ma’lum bo‘lgan voqealardan so‘ng, FIFA Tartib-intizom komissiyasiga bunday holat uchun zarur tartibga soluvchi choralar ko‘rilishini so‘rab rasmiy shikoyat yubordi.
Futboldek go‘zal sport turini tinch yo‘l bilan rivojlantirish tarafdorlari xavfsizligini ta’minlash juda muhim va biz buni amalga oshirish uchun barcha zarur ishlarni qilamiz”, deyiladi Argentina futbol assotsiatsiyasi bayonotida.
Eslatib o‘tamiz, Argentina terma jamoasi yarim himoyachisi Kristian Medinaning 90+16-daqiqada urgan goli evaziga o‘yinda hisobni tenglashtirdi. Golni nishonlash vaqtida Janubiy Amerika jamoasi futbolchilari tomon turli buyumlar uloqtirilgan. Shuningdek, Marokash terma jamoasi muxlislari maydonga yugurib chiqqan.
O‘yin tartibsizliklar tufayli to‘xtatildi. Ikki soatdan so‘ng o‘yin davom ettirildi. VAR tomonidan gol ko‘rib chiqildi va hakam golni bekor qilishga qaror qildi. 3 daqiqa davom etgan o‘yinning keyingi qismida hisob o‘zgarmay qoldi.
Izoh (0)