Сингапурда ESG Business журнали томонидан ESG соҳасида барқарор ва инновацион амалиётлар ҳамда ташаббусларни намойиш этган ташкилотлар тақдирланди. Ўзсаноатқурилишбанк бирйўла иккита мукофотга сазовор бўлди.
2019—2030 йилларга мўлжалланган Ўзбекистон Республикасининг “яшил” иқтисодиётга ўтиш стратегияси ташкилот ва муассасаларда ESG тамойилларини жорий этиш ишларини жадаллаштирди.
Ўзсаноатқурилишбанк томонидан ушбу тизим Халқаро молия корпорацияси билан ҳамкорликда жорий қилиниб, унинг асосида ишлаб чиқаришнинг атроф-муҳитга салбий таъсирини камайтиришга, энергия самарадорликни таъминлашга, табиий ресурсларни тежаш ва углерод чиқиндиларини минималлаштиришга эришилмоқда.
ESG Business журналининг нуфузли тадбири давомида Ўзсаноатқурилишбанкнинг ушбу йўналишдаги фаолияти алоҳида эътироф этилиб, муассаса кўмагида ишга туширилган 2 та лойиҳага махсус мукофотлар тақдим этилди.
Жумладан, Ўзбекистонда қайта тикланувчи энергия манбаларини жорий этганлик учун мукофот нефть ва газ соҳасига оид лойиҳа учун берилган бўлса, мамлакат саноатида энергия самарадорлигини таъминлаганлик учун мукофотга қурилиш материаллари ишлаб чиқариш тармоғидаги лойиҳа муносиб кўрилди.
Тақдирлаш маросимида банкнинг ESG тамойиллари асосидаги фаолияти табиий ресурсларни тежаш ва экологик барқарорликни таъминлаш билан бир қаторда илғор технологияларни фаол ўзлаштириш, маҳсулот таннархини пасайтириш, янги иш ўринларини яратиб, ишчи-ходимлар учун рақобатбардош иш ҳақи таклиф этиш каби муҳим ижтимоий-иқтисодий масалаларга ечимига хизмат қилиши таъкидланди.
Реклама ҳуқуқи асосида.
Изоҳ (0)