Oliy Majlis Qonunchilik palatasida 28-fevral kuni bo‘lib o‘tgan yig‘ilishda “Yuksalish” umummilliy harakati raisi Bobur Bekmurodov pedofillarga qarshi jazo choralarini kuchaytirishni taklif qildi.
Uning ta‘kidlashicha, hali ham qonunchilikda pedofiliyaga nisbatan qo‘llaniladigan jazolar yetarli emas. Masalan, 20 yoshli yigit pedofiliyaga oid jinoyatni sodir etib, 15 yil qamalsa, u 35 yoshida yana jamiyatga qayta kirib keladi.
“Jahon tajribasida bunga qarshi keng kompleks choralar ko‘riladi. Bu kimyoviy va jinsiy bichish amaliyoti, ta’lim muassasalari atrofida 10 km radiusda istiqomat qilmaslik yoki pedofillarning ochiq ro‘yxatlarini e’lon qilish masalalarini qonunchilikka kiritish kerak. Ichki ishlar vazirligi ularning ro‘yxatini doimo ochiq tarzda e’lon qilib borishi kerak. Buni nega aytyapman, istalgan jinoyatga jamiyatga uncha e’tibor bermasligi mumkin, oddiy hol deb qabul qilinishi mumkin. Bizning jamiyatda bola oliy qadriyat sifatida qaraladi. Shuning uchun bolaga nisbatan zo‘ravonlik bo‘lsa, jinoyat bo‘lsa, xalq larzaga keladi. Mana shu nuqtayi nazardan, qonunning tegishli qismini yanada kuchaytirishimiz kerak”, — deydi Bobur Bekmurodov.
Eslatib o‘tamiz, Yangihayot tumanida zo‘rlik va qotillik alomatlari bilan 12 yoshli qizning murdasi topilgandi. Mazkur holat yuzasidan jinoyat ishi qo‘zg‘atilgan. Jinoyat ishi bo‘yicha gumonlanuvchi shaxs (29 yoshli erkak) Jinoyat-protsessual kodeksining 221-moddasi tartibida ushlangan.
Shundan so‘ng Toshkent shahri Oila va xotin-qizlar boshqarmasi maktab o‘quvchilarining ota-onalariga murojaat qilgandi. Ta‘kidlanishicha, ota-onalar farzandlariga o‘zi hamrohlik qilishi va maktabga olib borib maktabdan olib ketishi kerak. Ular bilan doimo aloqada bo‘lib turish lozim.
Izoh (0)