AQSHning Oregon shtatida yashovchi olti yoshli Romeo dunyodagi eng baland buqaga aylanib, Ginnes rekordlari kitobiga kiritildi. Hozir uning bo‘yi 1,94 metrga yetadi. Qishloq xo‘jaligida keng tarqalgan sigir va ho‘kizlar uchun mazkur ko‘rsatkich anomal va kamyob hisoblanadi.
Rekordchi buqaning hayoti ham qiziq kechgan: tug‘ilganiga bir necha hafta bo‘lganda uni Oregon shtatidagi hayvonlar boshpanasi egalari Misti va Robert Mur qutqarib qolishgan.
“Buqalar, tabiiyki, sut berishga qodir emas, shuning uchun fermer xo‘jaligida unga ortiqcha sarf-xarajat qilishni istashmagan va buzoqni so‘yib yubormoqchi bo‘lishgan”, — deydi Robert.
“Biroq biz Romeoni o‘zimiz bilan olib ketishga qaror qilganmiz”, — deydi Misti Ginnes rekordlar kitobi veb-saytida chop etilgan intervyusida.
Ularning ta’kidlashicha, buqa o‘zining gigant o‘lchamiga qaramay, juda yuvosh jonivor, u insonlarni yaxshi ko‘radi va yomg‘irdan qo‘rqadi. U kuniga 40 kilogramm pichan va 7 kilogramm don yeydi. Bunday hayvonni ta’minlash juda qimmatga tushadi. Shuningdek, shtatdagi hech qaysi veterinar klinikada uning gabaritlariga mos uskunalar mavjud emas.
-1tMPTv-k.jpeg)
“Ammo uning doim bizdan minnatdor ekanini ko‘rib xursand bo‘lamiz, axir Romeo bularning barchasiga arziydi”, — deya qo‘shimcha qildi Misti.
Avvalroq Germaniyaning Krefeld nomli hayvonot bog‘ida yashovchi ikki barmoqli Yan ismli yalqov hayvoni o‘z turiga mansub tarixdagi eng keksa hayvon sifatida Ginnes rekordlari kitobiga kiritilgani haqida xabar bergan edik.
Izoh (0)