Bugun, 2-oktyabr kuni Toshkent shahrida IV Butunjahon Kreativ iqtisodiyot anjumani bo‘lib o‘tdi. Bu haqda “Daryo” muxbiri xabar berdi.
Madaniyat va sanʼatni rivojlantirish jamg‘armasi tomonidan tashkil etilgan tadbirda 75 davlatdan sanʼat, madaniyat, arxitektura, moda va boshqa ijodiy soha vakillari ishtirok etdi.
Anjumanda kreativ iqtisodiyot kelajagi, yangi texnologiyalar, xususan, sunʼiy intellektning mazkur sohaga taʼsiri muhokama qilindi.
Taʼkidlanishicha, dunyoda madaniy va ijodiy sanoat yiliga taxminan 2,3 trillion dollar daromad keltiradi. Bu global yalpi ichki mahsulotning qariyb 3,1 foiziga teng. 2030-yilga borib mazkur ko‘rsatkich 10 foizga o‘sishi kutilmoqda.
Tadbirda ishtirok etayotgan arxitektor Taxmina Turdialiyeva fikrlari bilan bo‘lishdi.
“Ijodkorlar o‘z iqtidorini sotadi. Bunda xarajat kam, lekin daromad yaxshi bo‘ladi. Chunki iqtidor doim yuqori baholanadi. O‘zbekiston kreativ iqtisodiyotni iqtidorli ijodkorlarni qo‘llab-quvvatlash orqali rivojlantirmoqchi. Masalan, men arxitektorman. Faoliyatim qo‘llab-quvvatlansa, loyihalarim chet elga eksport qilinsa, shu orqali mamlakatga pul keladi va bu iqtisodiyot o‘sishiga taʼsir qiladi. Ijodkorlik iqtisodni o‘stirishda eng kam xarajatli yo‘l hisoblanadi. Biz yosh arxitektorlarga o‘zimiz loyiha ham, unga pul ham topa olamiz. Faqat hukumat tomonidan administrativ qo‘llab-quvvatlov kerak. Shundagina bu soha iqtisodiyot drayveriga aylanadi”, dedi mutaxassis.
Madaniyat vaziri Ozodbek Nazarbekov fikriga ko‘ra, O‘zbekistonda ijodiy yo‘nalishlarda katta moliyaviy manfaatdorlik hali shakllanmagan.
“Oddiy misol, mualliflar huquqi to‘liq himoyalanmagan. Bunday anjumanlar sohaning huquqiy asoslarini yaratishga turki beradi. Kreativ iqtisodiyot xalqaro darajada yo‘qolib borayotgan qo‘l mehnatini himoya qilish uchun ham yaxshi omil bo‘ladi. O‘zbekiston hunarmandchilik rivojlangan davlat. Biz ijodiy mahsulotlarimizni jahon bozorlariga taqdim qila olishimiz kerak”, deydi madaniyat vaziri.
Tadbir 4-oktyabrgacha davom etadi. Dastur doirasida turli yig‘ilishlar, panel muhokamalari, mahorat darslari o‘tkaziladi.
Ishtirokchilar uchun madaniy dastur, sanʼat ko‘rgazmalari va alohida netvorking imkoniyatlari yaratiladi.
Konferensiya yakunida Yoshlar ishlari agentligi hamda Madaniyat va sanʼatni rivojlantirish jamg‘armasi yoshlar uchun startap tanlovi eʼlon qilishi ko‘zda tutilgan. Mazkur tanlov doirasida yosh isteʼdodlar o‘z loyihalarini namoyon qilish imkoniyatiga ega bo‘ladi.
Maʼlumot uchun, 2018-yilda Indoneziyada kreativ iqtisodiyot bo‘yicha ilk anjuman o‘tkazilgan. Mazkur soha barqaror o‘sishni taʼminlash, resurslarga bog‘liq iqtisodiyotdan bilim iqtisodiyotiga o‘tishda kreativ sohalar rolini qo‘llab-quvvatlashni ko‘zlaydi. Bu borada xalqaro hamkorlikni mustahkamlashga yordam beradi.
Izoh (0)