“Artist” teleloyihasidagi ishtiroki bilan tinglovchilarga yaxshi tanish bo‘lgan yosh xonanda Elyor Meliboyev ilk yakkaxon konsert dasturini taqdim etishga tayyorgarlik ko‘rmoqda. Aslida xonanda katta sahnadagi ijodini boshlaganiga ko‘p bo‘lgani yo‘q. Katta tajribaga ega bo‘lgan 22 yoshli xonandaning katta saroyda konsert berishi oson emas. Xo‘sh, Elyor Meliboyevning konsert berishini ko‘proq kim istadi?
— Konsert berishning masʼuliyati og‘ir ekan. Bir kun bo‘lsa ham katta tayyorgarlikni talab etadi. Tomoshabinlar oldida qo‘shiq kuylash qiyin emas, chunki yaqinda Namanganda bo‘lgan konsert dasturida 70-80 mingta tomoshabin oldida qo‘shiq kuylashimga to‘g‘ri keldi. Ammo yakkaxon konsert dasturining masʼuliyati o‘zgacha bo‘larkan.
Konsert berishni ko‘proq o‘zim xohladim. Farg‘ona sanʼat saroyida konsert beraman, deganimda negadir xuddi ko‘nglim sezgandek avval Toshkentda, keyin viloyatlar bo‘ylab konsert beraman deb xayoldan o‘tkazdim. Bir necha kundan keyin poytaxtdagi konsert tashkilotchilari taklif bilan chiqishdi, — deydi yosh xonanda.
Elyor Meliboyev nega to‘liq jonli ijroda konsert berishga ahd qilganini quyidagicha izohladi.
— Xalqimizni aldamaslik kerak. To‘qqiz yildan buyon sanʼat sohasida tahsil olyapman. Imkoniyat bo‘lsa, faqat jonli ijroda kuylash kerak. Fonogrammadan foydalanadigan xonandalardan uzr so‘rayman, ammo men halol mehnat tarafdoriman. Agar konsert faqat fonogramma orqali o‘tkaziladigan bo‘lsa, tomoshabin uyda diskdagi qo‘shiqni eshitib o‘tirgani ham maʼqul, — deydi Elyor Meliboyev.
Yosh xonanda konsertdagi kutilmagan holatlarga qanchalik tayyor ekani haqida ham gapirdi.
— Kutilmagan holatlar hamisha omad keltiradi. “Artist” loyihasida ishtirok etayotganimda “Yalala bobo” qo‘shig‘ini ijro etishimni aytganimda ko‘rsatuv prodyuseri rad etgandi. Chunki boshqa ishtirokchilar jahon klassikalarining saralarini ijro etishayotgandi. Xullas, boshqa qo‘shiqqa tayyorgarlik ko‘rib, sahnaga chiqdim. Ammo hayajondanmi gitaramning ovozi kutilganidek chiqmadi. Ovoz rejissori sensirab, qo‘pol muomala qildi. Uning gaplari qattiq taʼsir qilib, “Bo‘ldi ko‘rsatuvda ishtirok etmayman”, deb turganimda hakamlar hayʼatidagilar keyingi ishtirokchi bilan navbat almashishimni tavsiya qilishdi. O‘sha paytda hammasiga qo‘l siltab ketishga tayyor edim. Keyin biroz o‘tirib, “Baribir ketaman-ku, o‘zim bilmaydigan qo‘shiqni emas, biladiganimni aytaman”, dedim. Shartga ko‘ra, ikki yarim daqiqa qo‘shiq kulashimiz kerak edi. Men tanlagan “Yalala bobo” qo‘shig‘ining davomiyligi esa bor-yo‘g‘i 45 soniya edi. Xullas, qo‘shiq boshlanganidan keyin hakamlar hayʼatining ham muxlislarning ham emotsiyasi o‘zgardi. O‘shanda xayolimga kelgan uchta qo‘shiqni birin-ketin ijro etdim. Chunki muxlislarning olqishi menga kuch bag‘ishlayotgandi, — deydi yosh xonanda Elyor Meliboyev.
Agar yosh xonanda ilk yakkaxon konsert dasturiga qanday tayyorgarlik ko‘rayotganini bilishga qiziqsangiz, maxsus reportajni tomosha qiling.
Izoh (0)