Madaniyat vaziri Ozodbek Nazarbekov kiyimlar do‘konini reklama qilgani to‘g‘risida xabar berilgandi. Madaniyat vazirligi mazkur holatga munosabat bildirdi.
Qayd etilishicha, Ozodbek Nazarbekov The Voice of Uzbekistan loyihasi hakamlar hayʼati aʼzosi sifatida Kingsman Uzbekistan kiyimlar do‘koniga tashrif buyurib, loyihaning navbatdagi sonini tasvirga olish jarayonida qatnashish uchun loyiha imijmeykerlari bilan birgalikda libos tanlagan.
Libos tanlash jarayonida lavhada aytib o‘tilganidek, madaniyat vaziri milliy brend rivoji uchun o‘zining shaxsiy fikrlarini bildirib, tavsiya berib o‘tgan.
“Bu orqali mamlakatimizda yaratib berilgan qulay biznes muhiti tufayli faoliyatini samarali yo‘lga qo‘ygan, xorijnikidan aslo qolishmaydigan sifatli mahsulotlar tayyorlashga intilayotgan mahalliy ishlab chiqaruvchilarni qo‘llab-quvvatlash nazarda tutilgan”, — deyiladi munosabatda.
Ta’kidlanishicha, bundan Ozodbek Nazarbekovning hech qanday moddiy manfaatdorligi yoki reklama orqali naf olish maqsadi ko‘zlanmagan.
Ozodbek Nazarbekov madaniyat vaziri, qolaversa, O‘zbekiston xalq artisti va davlat xizmatchisi sifatida O‘zbekiston Respublikasining barcha qonunlarini hurmat qiladi va ularga qatʼiy rioya etadi. Shu o‘rinda, ommaviy axborot vositalari va jamoatchilikdan holatga xolisona baho berishlarini, jarayonni noo‘rin ayblovlar bilan yoritmasliklarini so‘rab qolamiz, — deya qayd etiladi munosabatda.
Avvalroq Ozodbek Nazarbekov rahbarligidagi Madaniyat vazirligi tomonidan 15 milliard 514 million 900 ming so‘mga ikkita maxsus avtomobil xarid qilingani jamoatchilik muhokamasiga sabab bo‘lgani xabar berilgandi.Vazirlik bunga izoh berar ekan, mazkur xarid prezident qaroridan kelib chiqqan holda amalga oshirilgan degandi.
Izoh (0)