“Mendirman Jaloliddin” seriali ijodkorlari va aktyorlar jamoasi bilan o‘tgan matbuot anjumani — suratlarda

Toshkent shahridagi “Hilton” mehmonxonasida 8-mart kuni “Mendirman Jaloliddin” seriali ijodkorlari ishtirokida matbuot anjumani tashkil etildi. Turkiyaning O‘zbekistondagi elchixonasi tomonidan o‘tkazilgan uchrashuvda OAV vakillari o‘zlarini qiziqtirgan savollarga javob oldi. “Daryo” muxbiri mazkur tadbirdan fotojamlanma tayyorladi.

Serialda Javohir Zokirov Chingizxon, Emre Kiviljim Jaloliddin Manguberdi, Gulenay Kalkan Turkon Xotun, Kaan Yalchin Sulton Alovuddin Muhammad, Sezgin Erdemir Temur Malik, Saida Rametova Turkon xotunning kanizi Oygul, Ra’no Shodiyeva Xorazmshoh Alovuddin Muhammadning xotini Oychechak, Rayhon Ulasenova Alovuddin Muhammadning xotini, O‘zloqshoh va Oqshohning onasi, Akbarxo‘ja Rasulov O‘zloqshoh, Feruza Normatova O‘tror hokimi Inolchixonning qizi, aktyorlar Jamshid Sagatov va Akmal Mirzo mog‘ul sarkardalari, Alixan Chingizxonning o‘g‘li Jo‘ji, Boyir Xolmirzayev Najmiddin Kubro, Tohir Saidov bosh vazir Nizomul mulk, Jahongir Abdumalikov Jaloliddin Manguberdinging muhofizi rollarini ijro etishgan.

Serial uchun Turkiyada 30 gektar maydonda barpo etilgan “Bo‘zdag‘ film” platosida O‘zbekistonning XIII asrga oid muhiti jonlantirildi. 1200 nafar ishchi-xizmatchining mehnati bilan 3500 kvadrat metr maydonda balandligi 5,5 metr bo‘lgan ikki qavatli Xorazmshoh saroyi qad ko‘tardi. Mendirman Jaloliddin serialining sahro jang sahnalari Istanbuldan 750 km masofadagi Oqsaroy muzofotida suratga olindi.

“Mendirman Jaloliddin” serialining birinchi fasli 13 qismdan iborat. Loyiha rahbari Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari Saida Mirziyoyeva. G‘oya muallifi hamda bosh prodyuser O‘zbekiston Respublikasi Madaniyat vaziri Ozodbek Nazarbekov.

Eslatib o‘tamiz, avvalroq O‘zbekiston Prezidenti Shavkat Mirziyoyev Xalqaro xotin-qizlar kuni munosabati bilan tantanali marosimda aktrisa Yulduz Rajabova ishtirokidagi filmni (aktrisa “Mendirman Jaloliddin” serialida Qutlibeka obrazini gavdalantirmoqda. Shuningdek, u “Oskar” mukofotiga tavsiya etilgan “Faridaning ikki ming qo‘shig‘i” filmida ham bosh rolni ijro etgan) e’tirof etib, uni ijodni susaytirmaslikka chaqirgan edi.