Saida Mirziyoyeva Dubay valiahdi bilan uchrashuv o‘tkazdi

Saida Mirziyoyeva 27-sentyabr kuni BAA bosh vaziri o‘rinbosari, mudofaa vaziri, Dubay amirligi valiahdi shayx Hamdan bin Muhammad bin Rashid al Maktum bilan uchrashuv o‘tkazdi.

“Ishonamanki, yuqori darajadagi forum doirasida o‘tkazilgan bu uchrashuv O‘zbekiston bilan BAA o‘rtasidagi yaqin va do‘stona munosabatlarni yanada mustahkamlashga xizmat qiladi”, deb yozdi prezident yordamchisi.

Muloqot davomida turli sohalardagi ikki tomonlama hamkorlik masalalarining keng doirasi, shuningdek, ustuvor yo‘nalishlarda qo‘shma dastur va loyihalarni amalga oshirish istiqbollari muhokama qilingan.

Toshkentda 27-sentyabr kuni O‘zbekiston va BAA hukumatlararo tajrima almashinuv davrasi boshlandi. Unda har ikki davlat hukumatlari vakillari, davlat organlari rahbarlari, mas’ullari, ICBA, Fly Dubai, Abu-Dabi taraqqiyot fondi kabi tashkilotlar rahbariyati hamda OAV vakillari ishtirok etmoqda.

So‘nggi yillarda O‘zbekiston bilan BAA o‘rtasidagi ko‘p qirrali munosabatlar rivojlanib bormoqda. Ushbu tadbir ham davlat boshqaruvi, iqtisodiyot, ijtimoiy sohaning ustuvor yo‘nalishlari bo‘yicha ikki tomonlama hamkorlikni yanada rivojlantirish, yangi loyiha va tashabbuslarni amalga oshirish bo‘yicha kelishuvlarga erishish maqsadida tashkil etildi.