Disney kompaniyasi “Qattiqqo‘l xonim” filmining davomini suratga olishi mumkin. Bu haqda Deadline nashriga tayanib “Pravila jizni” xabar berdi.
Filmda qat’iy va talabchan rahbar, bosh muharrir Miranda Pristli rolini o‘ynagan aktrisa Meril Strip va moda jurnali xodimi obrazini gavdalantirgan Emili Blant o‘z rollariga qaytishi mumkin. Hali aktrisalar suratga olish shartnomasini imzolamagan.
Filmning davomi bo‘yicha muzokaralar uning rejissyori Devid Frenkel tomonidan olib borilmoqda, ssenariy muallifi Alin Brosh Makkenna. Mazkur xabarlarga Disney hozircha izoh bermagan.
Taxminlarga ko‘ra, filmning keyingi qismida Podium jurnali muvaffaqiyatsiz kunlarni boshidan kechirishi haqida hikoya qilinadi. Uning bosh muharriri Miranda Pristli yirik lyuks brend bilan reklama shartnomasini imzolashni rejalashtiradi. Buning uchun u o‘zining sobiq yordamchisi, hozirda o‘sha brendda yetakchi lavozimni egallab turgan Emilidan yordam so‘raydi.
Aktrisa Enn Hetuey o‘z roliga qaytish masalasi hozircha ochiq qolmoqda, biroq joriy yilning boshida u “Qattiqqo‘l xonim” filmining davomi suratga olinishi dargumon, degan fikrni bildirgandi.
Loren Vaysbergerning “Prada kiygan iblis” nomli kitobi asosida rejissyor Devid Frenkel tomonidan suratga olingan “Qattiqqo‘l xonim” filmi 2006-yilda ekran yuzini ko‘rgan. Loyiha Meril Stripga komediya janridagi eng yaxshi aktrisa roli uchun “Oltin globus” mukofotini va bosh rol uchun “Eng yaxshi aktrisa” nominatsiyada “Oskar” mukofotini olib kelgan.
Avvalroq film asosida myuzikl qo‘yilishi ham ma’lum bo‘lgan edi. Unda Miranda Pristli rolini Vanessa Uilyams ijro etadi.
Izoh (0)