Rossiyadan deportatsiya qilinayotgan migrantlar videoga olinadi

Rossiyada muhojirlarni deportatsiya qilish jarayoni to‘liq videotasvirga olinadi. Bu haqda Federal sud pristavlari xizmati ma’lumotiga tayanib, “Kommersant” xabar berdi.

Sud pristavlari xizmati fiksatsiya vositalaridan foydalanish bo‘yicha buyruq loyihasi ishlab chiqdi. Unga ko‘ra, xodimlar suddan qochganlarni sudga olib borish va migrantlarni mamlakat hududidan chiqarish jarayonlarini videokameraga muhrlaydi. Suratga olish oldindan ogohlantiriladi, barcha materiallar arxivda saqlanadi. Videokameralar o‘rnatilgan obyektlarda esa axborot belgilari o‘rnatiladi.

Jarayonda turli xil uskunalardan foydalanish rejalashtirilgan. Ular orasida statsionar IP-kameralar, ko‘chma va portativ videoregistratorlar, fotoapparatlar, audio va video ma’lumotlarni yozuvchi qurilmalar bor.

Ta’kidlanishicha, bu fuqarolar huquqlariga rioya etilishining qo‘shimcha kafolatlarini ta’minlaydi. Jinoiy yoki ma’muriy ishlar bo‘yicha faoliyat yuritishda, ijro harakatlarini bajarishda, choralar qo‘llashda xolisona nazoratni amalga oshirish va tafsilotlarni muhrlashga imkon beradi.