Россиядан депортация қилинаётган мигрантлар видеога олинади

Россияда муҳожирларни депортация қилиш жараёни тўлиқ видеотасвирга олинади. Бу ҳақда Федерал суд приставлари хизмати маълумотига таяниб, “Коммерсант” хабар берди.

Суд приставлари хизмати фиксация воситаларидан фойдаланиш бўйича буйруқ лойиҳаси ишлаб чиқди. Унга кўра, ходимлар суддан қочганларни судга олиб бориш ва мигрантларни мамлакат ҳудудидан чиқариш жараёнларини видеокамерага муҳрлайди. Суратга олиш олдиндан огоҳлантирилади, барча материаллар архивда сақланади. Видеокамералар ўрнатилган объектларда эса ахборот белгилари ўрнатилади.

Жараёнда турли хил ускуналардан фойдаланиш режалаштирилган. Улар орасида стационар IP-камералар, кўчма ва портатив видеорегистраторлар, фотоаппаратлар, аудио ва видео маълумотларни ёзувчи қурилмалар бор.

Таъкидланишича, бу фуқаролар ҳуқуқларига риоя этилишининг қўшимча кафолатларини таъминлайди. Жиноий ёки маъмурий ишлар бўйича фаолият юритишда, ижро ҳаракатларини бажаришда, чоралар қўллашда холисона назоратни амалга ошириш ва тафсилотларни муҳрлашга имкон беради.