Belgradda noma’lum shaxslar stadion maysasini yoqib yubordi

Belgradda 22-sentyabr kuni “Partizan” futbol klubi stadionida yong‘in sodir bo‘ldi.

Noma’lum shaxslar maydonga tez yonuvchi suyuqlik sepgan, stadion maysasiga shisha butilka bo‘laklarini sochib, so‘ng maydonga o‘t qo‘ygan. “Partizan” rahbariyati barcha kerakli ma’lumotlarni huquq-tartibot idoralariga taqdim qildi, klub xodimlari hozirda maysazorni tiklash ustida ishlamoqda.

Ma’lumot uchun, bugun, 23-sentyabr kuni Serbiya chempionatining 9-turidan o‘rin olgan “Partizan” — “Srvena Zvezda” uchrashuvi Belgradda bo‘lib o‘tishi kerak edi. Bu derbi jahon futbolidagi eng murosasiz derbilardan biri hisoblanadi.

“Partizan” olti o‘yinda 11 ochko jamg‘arib, milliy chempionat turnir jadvalida 7-o‘rinda bormoqda. “Srvena Zvezda” 7 uchrashuvdan keyin 19 ochko bilan turnir jadvalida peshqadamlik qilmoqda.

Uchrashuv maydoni ko‘chirilgani haqida hozircha ma’lumot yo‘q.