Toshkentda 32 yoshli erkak qizi sabab o‘zidan 16 yosh kichik bolani kaltaklagani haqida xabar berilgandi. Poytaxt shahar sudlari holat yuzasidan o‘tkazilgan sud qarorini “Daryo”ga taqdim qildi.
Ma’lum qilinishicha, 16-sentyabr kuni soat 13:30 larda I.M. va D.N. 322-sonli o‘rta maktabda o‘quvchi qizini maktabda haqorat qilgan sinfdoshi M.T.ni qizidan kechirim so‘rashini talab qilish maqsadida, u yashab kelayotgan uyga kelgan. Shu yerda ko‘chada yurgan M.T.ni ko‘rib qolib, baqir-chaqir qilgan va undan qizidan tiz cho‘kib, kechirim so‘rashni talab qilgan.
Shu vaqt voqea joyiga kelib qolgan M.T.ning akasi, 2008-yil tug‘ilgan T.T.ni ham haqorat qilib, uni tanasini turli joylariga qo‘llari bilan urgan. Janjalga D.N. ham aralashib, voyaga yetmagan bolaning yelkasiga bir necha marta urgan. U olgan tan jarohati yuzasidan shifoxonaga murojaat qilgan va birlamchi tibbiy ko‘rikdan o‘tganida, unda ko‘krak qafasining chap tomon to‘qimalarining lat yeyishi mavjudligi aniqlangan.
Unga nisbatan sud tibbiy ekspertizasini o‘tkazish belgilangan bo‘lsa-da, bola va uning qonuniy vakili bo‘lgan onasi sud-tibbiy ekspertizasidan o‘tishdan bosh tortgan.
Sud qarori bilan erkakka nisbatan 15 sutka ma’muriy qamoq jazosi tayinlandi. Uning ayoliga esa 340 ming so‘m jarima jazosi berildi.
Bundan avval Buxoro viloyati Olot tumanida erkak o‘g‘li bilan urishgan 5 yashar bolani kaltaklagani haqida xabar berilgandi. Shuningdek, Andijondagi bog‘chada tarbiyachi bolaning yuziga bir necha bor tarsaki tushirgani to‘g‘risida xabar berilgandi.
Izoh (0)