AQSH prezidenti Jo Bayden qisqa vaqt ichida Donald Trampga ikkinchi marta suiqasd uyushtirilishi munosabati bilan mamlakatda siyosiy zo‘ravonliklardan ogohlantirdi.
Amerika yetakchisi Pensilvaniya shtatining Filadelfiya shahrida bo‘lib o‘tgan anjumanda jurnalistlar oldida chiqish qilgan.
“Men har doim siyosiy zo‘ravonlikni qoralaganman va bundan keyin ham qoralayman”, deydi Bayden.
U mamlakatda kelishmovchiliklar qurol bilan emas, balki saylov orqali tinch yo‘l bilan hal qilinishi kerakligini ta’kidlagan.
“Amerika qotillarning otishmasidan juda ko‘p marta fojialarga duch kelgan. Bu hech narsani hal qilmaydi. Bu shunchaki mamlakatni parchalamoqda. Biz zo‘ravonlikni oldini olish uchun harakat qilishimiz hamda uning ildiz otishiga yo‘l qo‘ymasligimiz kerak”, deya qo‘shimcha qilgan Amerika yetakchisi.
Baydenga ko‘ra, “yuqori darajadagi siyosatchilarni himoya qiluvchi Maxfiy xizmat qo‘shimcha yordamga muhtoj”. U AQSH Ichki xavfsizlik departamenti tarkibidagi agentlik hozirda qo‘shimcha xodimlarga ehtiyoj bor-yo‘qligini hal qilayotganini ta’kidlagan.
Izoh (0)