Qirg‘iziston yirik va mayda shoxli chorva mollarini eksport qilish uchun ruxsatnomani rasmiylashtirish va berishni vaqtincha to‘xtatdi. Bu haqda mamlakat Suv resurslari, qishloq xo‘jaligi va qayta ishlash sanoati vazirligi xabar berdi.
Ma’lum qilinishicha, vazirlik huzuridagi veterinariya xizmati qishloq xo‘jaligi hayvonlarini inventarizatsiya qilish ishlari sabab otlar, yirik va mayda shoxli chorva mollarini mamlakatdan tashqariga chiqarishni chekladi.
Chorva mollarning aniq hisobini olish ko‘rsatilayotgan xizmatlar sifatini oshirish hamda veterinariya-sanitariya me’yorlariga rioya etilishini nazorat qilish maqsadida amalga oshiriladi.
Cheklovlar 15-20 kun davom etadi, shundan so‘ng eksportga ruxsatnomalar berish qayta tiklanadi.
2024-yilda O‘zbekiston Qirg‘iziston chorva mollarining asosiy xaridorlaridan biriga aylandi. Joriy yilning birinchi yarmida O‘zbekistonga Qirg‘izistondan 53,4 ming bosh chorva mollari jo‘natilgan. 2023-yilning shu davrida bu ko‘rsatkich atigi 5 ming boshni tashkil etgan.
Izoh (0)