Qirg‘iziston sobiq rahbari Asqar Akayev parlamentdan unga sobiq prezident maqomini qaytarib berishni so‘radi. Bu haqda “AKIpress” xabar berdi.
Jo‘qorg‘i Kenesh konstitutsiyaviy qo‘mitasi rahbari Cho‘lpon Sultonbekova uning xati qo‘mitaga 5-sentyabr kuni kelib tushgani, hali uni chuqur o‘rganib chiqmaganini aytdi. Sultonbekova xat bilan tanishib chiqqach, uni fraksiya yetakchilariga yuborishini, so‘ngra maslahatlashuvlar o‘tkazilishini bildirdi. U bu juda uzoq jarayonligi va parlamentning qanday qaror qabul qilishi noma’lumligini aytdi.
Asqar Akayev Qirg‘izistonni mustaqillikning ilk yillaridan 2005-yilgacha boshqargan. 2005-yil mart oyida ommaviy norozilik namoyishlari hukumat almashishiga olib kelgan. O‘shanda Akayev va uning oila a’zolari Qirg‘izistondan Moskvaga qochib ketgan. Keyinroq prezident iste’foga chiqqan.
“Qumtor” oltin konini o‘zlashtirish bilan bog‘liq jinoyat ishi doirasida Asqar Akayevga 1992-yilda Cameco kompaniyasi bilan bosh kelishuvni tuzish, 2003-yilda “Qumtor” loyihasini qayta tashkil etish epizodlari bo‘yicha jinoyatga sheriklik qilish, hokimiyat yoki mansab vakolatlarini suiiste’mol qilishda ayblov e’lon qilindi.
2010-yilda, aprel inqilobidan keyin Akayev Qirg‘izistonning sobiq prezidenti maqomidan mahrum qilingandi.
2021-yilda u Qirg‘izistonga ikki marta – “Qumtor” ishi bo‘yicha tergov doirasida Milliy xavfsizlik davlat qo‘mitasida so‘roq qilish uchun kelgan. Shundan so‘ng u Moskvaga qaytib ketgan. Milliy xavfsizlik davlat qo‘mitasi maʼlumotlariga ko‘ra, Akayev jinoyatni sodir etishdagi aybini to‘liq tan olgan va tergov bilan faol hamkorlik qilgan. Unga nisbatan qo‘zg‘atilgan jinoyat ishi da’vo muddati o‘tgani sababli to‘xtatilgan.
Izoh (0)