Қирғизистон йирик ва майда шохли чорва молларини экспорт қилиш учун рухсатномани расмийлаштириш ва беришни вақтинча тўхтатди. Бу ҳақда мамлакат Сув ресурслари, қишлоқ хўжалиги ва қайта ишлаш саноати вазирлиги хабар берди.
Маълум қилинишича, вазирлик ҳузуридаги ветеринария хизмати қишлоқ хўжалиги ҳайвонларини инвентаризация қилиш ишлари сабаб отлар, йирик ва майда шохли чорва молларини мамлакатдан ташқарига чиқаришни чеклади.
Чорва молларнинг аниқ ҳисобини олиш кўрсатилаётган хизматлар сифатини ошириш ҳамда ветеринария-санитария меъёрларига риоя этилишини назорат қилиш мақсадида амалга оширилади.
Чекловлар 15-20 кун давом этади, шундан сўнг экспортга рухсатномалар бериш қайта тикланади.
2024 йилда Ўзбекистон Қирғизистон чорва молларининг асосий харидорларидан бирига айланди. Жорий йилнинг биринчи ярмида Ўзбекистонга Қирғизистондан 53,4 минг бош чорва моллари жўнатилган. 2023 йилнинг шу даврида бу кўрсаткич атиги 5 минг бошни ташкил этган.
Изоҳ (0)