Raqobatni rivojlantirish va isteʼmolchilar huquqlarini himoya qilish qo‘mitasi “Toshkent shahar suv ta’minoti” AJga nisbatan ish qo‘zg‘atdi.
Qo‘mita matbuot xizmatining ma’lum qilishicha, Uzcarlsberg MCHJ “Toshkent shahar suv ta’minoti” xizmatidan norozi bo‘lib murojaat qilgan. Ular o‘rtasida “Chiqindi suvlarni shahar kanalizatsiyasiga chiqarish to‘g‘risida”gi kommunal-ekologik normativ hujjat rasmiylashtirilgan bo‘lib, unga ko‘ra, Uzcarlsberg’ga chiqindi suvlarni shahar kanalizatsiyasiga chiqarib yuborish uchun suv hajmi 68 foiz koeffitsiyent qo‘llanishi belgilangan.
Biroq “Toshkent shahar suv ta’minoti” tomonidan 76 foiz koeffitsiyent qo‘llangani natijasida 75 million so‘mga yaqin ortiqcha to‘lov hisoblangani aniqlangan.
Yuqoridagi holatlar bo‘yicha, hududiy boshqarma tomonidan Raqobat qo‘mitasi “Toshkent shahar suv ta’minoti” AJga nisbatan “Tabiiy monopoliyalar to‘g‘risida”gi qonunning 16-moddasi (tabiiy monopoliya subyektlarining tovarlaridan foydalanish shartlarini tiqishtirish yoki tabiiy monopoliya subyektlarining belgilangan narxlarda (tariflarda) hisobga olinmagan haq undirish evaziga daromad olishga olib keladigan boshqacha xatti-harakatlarni sodir etish man etiladi) talablarini buzganlik alomatlari mavjud deb belgilangan tartibda ish qo‘zg‘atdi.
Izoh (0)