“Наманган сув таъминоти” АЖ томонидан олиб борилган давлат харидларида “Рақобат тўғрисида”ги қонун талаблари бузилгани аниқланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар қилди.
Қўмитанинг вилоят ҳудудий бошқармаси “Наманган сув таъминоти” томонидан 2023—2024 йилларда амалга оширилган давлат харидлари юзасидан ўрганиш ва таҳлиллар олиб борган.
Жумладан, Наманган вилоят прокуратурасининг топшириғига кўра, “Наманган сув таъминоти” буюртмачилигида 2023 йил давомида ҳамда 2024 йил 16 июнь кунига қадар жами 167 та лот бўйича бошланғич нархи 4,9 миллиард сўмга яқин амалга оширилган давлат харидлари ўтказилган.
Ўрганишлар давомида мазкур акциядорлик жамияти томонидан юқоридаги давлат харидларини амалга оширишда “Рақобат тўғрисида”ги қонун талабларига риоя этилмагани аниқланган. Бундан ташқари, буюртмачи томонидан 36 та лот бўйича бошланғич нархи 846,1 миллион сўмлик танлов савдоларида бир-бирига боғлиқ бўлган (аффилланган) жамиятлар ғолиб деб топилган.
Қайд этилишича, ҳудудий бошқарма томонидан давлат харидларида “Рақобат тўғрисида”ги қонун талаблари бузилгани юзасидан буюртмачи ташкилот — “Наманган сув таъминоти”га нисбатан тузилган маълумотлар ҳуқуқни муҳофаза қилувчи органга тақдим этилди.
Шунингдек, “Наманган сув таъминоти” мансабдорларига нисбатан маъмурий жарима қўллаш бўйича маъмурий баённома расмийлаштирилиб, тегишли суд органига маълумотлар юборилди.
Бундан аввал Рақобат қўмитаси “Тошкент шаҳар сув таъминоти”га нисбатан иш қўзғатганди. Сирдарё туман Ободонлаштириш бошқармаси ўтказган 954 миллион сўмлик давлат харидларида қонун бузилиши ҳолати аниқланганди.
Коррупцияга қарши курашиш агентлиги берган маълумотга кўра, 2024 йилнинг июнь—июль ойларида жами 11 миллиард сўмлик давлат харидларида қонун бузилиши ҳолатлари аниқланган.
Изоҳ (0)