Ozarbayjon va O‘zbekiston paromlarni birgalikda ishlab chiqarishni yo‘lga qo‘yishni rejalashtirmoqda. Bu haqda manbalarga tayanib, Trend xabar berdi.
Paromlar O‘zbekiston ehtiyojlari uchun taqdim etiladi. Loyihani moliyalashtirish hajmi 150 million AQSH dollarini tashkil etadi. Tomonlar transport va tranzit sohasida ikki tomonlama hamkorlikni kengaytirish uchun aniq chora-tadbirlar ishlab chiqmoqda. Xususan, gap ombor infratuzilmasini birgalikda qurish, Transkaspiy yo‘nalishi bo‘yicha tashuvlarni rivojlantirish uchun qo‘shma korxona tashkil etish va boshqa loyihalar haqida bormoqda.
22-avgust kuni Toshkentda O‘zbekiston—Ozarbayjon biznes-forumi bo‘lib o‘tdi. Muzokaralar yakunida 2 milliard dollarlik loyihalar portfeli shakllantirildi.
Bundan tashqari, 23-avgust kuni prezident Ilhom Aliyevning Toshkentga tashrifi doirasida davlat rahbarlarining ikki mamlakat ishbilarmon doiralari vakillari bilan uchrashuvi bo‘lib o‘tdi. Uchrashuv yakunida umumiy qiymati 520 million dollarlik 7 ta loyiha ishga tushirishga tayyorlandi.
2023-yilning avgust oyida transport vazirining sobiq o‘rinbosari Abdusamat Mo‘minov O‘zbekistonning Boku portidagi ombor infratuzilmasidan foydalanishga qiziqishi borligini aytgandi. 2022-yilda Boku porti orqali yuk tashish hajmi 904 ming tonnani tashkil etib, bu ko‘rsatkich o‘tgan yilga nisbatan 65 foizga oshdi.
Oldingi uchrashuvda O‘zbekiston va Ozarbayjon prezidentlari Transkaspiy yo‘lagi doirasida qo‘shma logistika kompaniyasini tashkil etish, Boku va uchinchi davlatlar portlarida omborlar va logistika markazlarini qurish imkoniyatlarini muhokama qilgan.
Izoh (0)