Rossiya prezidenti Vladimir Putinning O‘zbekistonga davlat tashrifi doirasida 27-may Jizzaxda atom elektr stansiyasi qurishdagi hamkorlikka oid hukumatlararo bitimga o‘zgartirish kiritish to‘g‘risidagi bayonnoma imzolandi.
“O‘zatom” agentligi huzuridagi “AES qurilishi direksiyasi” DUK va “Rosatom” tuzilmasidagi “Atomstroyeksport” AJ injiniring kompaniyasi o‘rtasida O‘zbekistonda kam quvvatli atom elektr stansiyasi qurilishi bo‘yicha shartnoma tuzildi. Imzolangan kelishuvlarga asosan, Jizzax viloyatida Rossiya loyihasi asosida 330 MW quvvatga ega (har biri 55 MW quvvatli 6 ta reaktordan iborat) AES quriladi. Bu haqda “O‘zatom” maʼlum qilmoqda.
Stansiya qurilishida “Rosatom” bosh pudratchi bo‘ladi, O‘zbekiston kompaniyalari ham ishtirok etadi.
Prognozlarga ko‘ra, O‘zbekistonda 2050-yilga borib energiya resurslariga bo‘lgan talab qariyb ikki baravar ko‘payadi va, ko‘rinib turibdiki, energetika tizimining barqaror ishlashi va iqtisodiyotning rivojlanishi uchun mamlakatimiz o‘zini qayta tiklanadigan energiya manbalaridan tashqari, asosiy energiya manbalari bilan ham taʼminlashi kerak. Biz hozir butun dunyoda ham yuqori quvvatli atom elektr stansiyalarini qurish, ham kichik modulli reaktorlar loyihalari nuqtai nazaridan yangi yadro quvvatlarini yaratishga qiziqish ortib borayotganini ko‘rmoqdamiz. “Rosatom” bilan hamkorlikni kengaytirish esa energetika kompleksimizni atom energetikasidagi ilg‘or texnologiyalar bilan mustahkamlash imkonini beradi, deb hisoblaymiz, — dedi Atom energetikasi agentligi direktori Azim Axmedxadjayev.
“Rosatom” direktori Aleksey Lixachev rahbarligidagi korporatsiya kam quvvatli AES loyihasini qurish bo‘yicha eksport shartnomasini tuzgan jahondagi birinchi kompaniya bo‘lgan.
“Va bu shunchaki dastlabki kelishuv emas, biz zudlik bilan shu yozda qurilishni boshlaymiz”, – deydi Lixachev.
Rasmiy xabarda aytilishicha, AES uchun tanlangan maydonda tekshiruv ishlari o‘tkazib bo‘lingan, joyning maqsadga muvofiqligi va xavfsizligi tasdiqlangan, bu esa loyihani amalga oshirish vaqtini sezilarli qisqartiradi.
“Tanlangan maydonda qurilish ishlari 2024-yilning yozidayoq boshlanadi”, – deyiladi “O‘zatom” axborotida.
Izoh (0)