Toshkent shahar Sergeli tumanida Nexia-3 to‘xtab turgan Damas’ga urilib, uni ag‘darib yubordi. Bu haqda YHXB axborot xizmati xabar berdi.
![](/static/2024/09/02/dmm-5HF1la0L.jpg)
Ma’lum qilinishicha, holat 2-sentyabr kuni soat 17:10 larda Sergeli tumani THAY ko‘chasida sodir bo‘lgan. 2001-yilda tug‘ilgan T.X. Nexia-3 avtomashinasini boshqarib kelayotib yo‘l chetida harakatsiz turgan 1987-yilda tug‘ilgan A.E. boshqaruvida bo‘lgan Damas bilan to‘qnashgan.
![](/static/2024/09/02/dm2-NYvk0N4l.jpg)
YTH natijasida haydovchilar tan jarohat olib, shifoxonaga yotqizilgan. Mazkur holat yuzasidan Toshkent shahar IIBB YHXB mas’ul xodimlari tomonidan surishtiruv ishlari olib borilmoqda.
O‘zbekistonda 2023-yilda transport vositasini boshqarish huquqidan mahrum qilinganiga qaramay, qaytadan rulga o‘tirgan shaxslar 707 ta YTH sodir etgan. Buning oqibatda 212 nafar shaxs vafot etgan, 546 nafari esa turli darajadagi tan jarohatlari olgan.
Haydovchilik guvohnomasidan mahrum qilinganlar umumiy haydovchilar sonining 0,3 foizini tashkil qilgani holda, ular tomonidan sodir etilgan yo‘l-transport hodisalari jami yuz bergan avariyalarning 11 foizini tashkil etgan.
2024-yilning birinchi yarmida O‘zbekiston bo‘yicha qonuniy ravishda o‘qib, haydovchilik guvohnomasiga ega bo‘lgan shaxslar tomonidan 10 million 200 mingdan ortiq qoidabuzarlik sodir etilgan.
Qayd etilishicha, bu davrda YTHning 58,5 foizi piyodalar ishtirokida sodir etilgan. Piyodalar ishtirokidagi hodisalarning 20 foizi piyodalar o‘tish joylari tashkil etilmagani oqibatida, 19 foizi esa piyodalar o‘tish joyi mavjud bo‘lsa-da, piyodalar tomonidan ongli ravishda yo‘l harakati qoidalariga bo‘ysunmasdan yo‘lning belgilanmagan joyidan kesib o‘tishlari oqibatida sodir bo‘lgan.
Izoh (0)