Telegram’ning 2023-yildagi umumiy zarari soliqlar to‘langandan keyin taxminan 173 million dollarni, operatsion xarajatlari esa 108 million dollarni tashkil etdi. Financial Times kompaniyaning moliyaviy hisoboti bilan tanishib chiqdi.
Ma’lum qilinishicha, platformaning 2023-yildagi daromadi 342 million dollarni tashkil etgan. Kompaniya 2026-yilda so‘ndirish muddati bilan qariyb 2,4 milliard dollar miqdorida qarz mablag‘larini jalb etdi. Xususan, 2021-yilda Telegram 1 milliard dollarlik obligatsiyalarni joylashtirdi, investorlar orasida Abu-Dabi davlat jamg‘armalari bor edi.
Oxirgi marta kompaniya 330 million dollarni 2024-yil boshida jalb qilgan, deb yozadi FT. Shu bilan birga, Telegram’ning 2023-yilgi moliyaviy hisobotida messenjer asoschisi Pavel Durovning o‘zi kamida 64 million dollarlik platforma obligatsiyalari sotib olgani keltirilgan.
Durov mart oyida Financial Times’ga messenjerning IPO o‘tkazish imkoniyatini ko‘rib chiqayotganini aytgandi. U platformani 30 milliard dollardan yuqori baholashayotganini aytgandi. Durov o‘shanda, “Telegram bu yil bo‘lmasa, keyingi yilda foyda keltira boshlashiga umid qilmoqdamiz”, deb ta’kidlagan. Platforma 2026-yilda fond bozoriga chiqishi kutilmoqda.
2023-yilda Telegram raqamli aktivlarining umumiy qiymati deyarli 400 million dollarni tashkil etgan bo‘lsa, 2024-yilda kompaniya Toncoin’ni taxminan 244 million dollarga sotdi.
Fransiyada Pavel Durovga nisbatan boshlangan tergov Telegram’ning yaqin ikki yil ichida IPO o‘tkazish rejalarini barbod qilishi mumkin, chunki investorlar va reklama beruvchilar platformaga sarmoya kiritishni xohlamaydi, deb yozadi FT ekspertlarga tayanib.
Durovning hibsga olinishi va ozod qilinish sharti
Telegram asoschisi 24-avgust kuni Ozarbayjondan Parijga shaxsiy samolyotida borganda Le Burje aeroportida qo‘lga olindi. U fransuz huquq-tartibot idoralari xodimlari bilan Telegram’da kiber va moliyaviy jinoyatlar masalalarida hamkorlik qilishdan bosh tortganlikda ayblandi.
Parij sudi uni platformaga aloqador avval e’lon qilingan 12 ta huquqbuzarlikdan 6 tasida, jumladan, hukumat bilan hamkorlik qilishdan bosh tortishda, bolalar pornografiyasini tarqatishda, narkotrafikda ishtirok etishda, shuningdek, uyushgan guruh tarkibidagi firibgarlikda aybladi. 29-avgust kuni u 5 million yevro miqdorida garov to‘lash, haftada ikki marta politsiya uchastkasiga kelish, Fransiyani tark etmaslik sharti bilan ozod qilindi.
Izoh (0)