Telegram’нинг 2023 йилдаги умумий зарари солиқлар тўлангандан кейин тахминан 173 миллион долларни, операцион харажатлари эса 108 миллион долларни ташкил этди. Financial Times компаниянинг молиявий ҳисоботи билан танишиб чиқди.
Маълум қилинишича, платформанинг 2023 йилдаги даромади 342 миллион долларни ташкил этган. Компания 2026 йилда сўндириш муддати билан қарийб 2,4 миллиард доллар миқдорида қарз маблағларини жалб этди. Хусусан, 2021 йилда Telegram 1 миллиард долларлик облигацияларни жойлаштирди, инвесторлар орасида Абу-Даби давлат жамғармалари бор эди.
Охирги марта компания 330 миллион долларни 2024 йил бошида жалб қилган, деб ёзади FТ. Шу билан бирга, Telegram’нинг 2023 йилги молиявий ҳисоботида мессенжер асосчиси Павел Дуровнинг ўзи камида 64 миллион долларлик платформа облигациялари сотиб олгани келтирилган.
Дуров март ойида Financial Times’га мессенжернинг IPO ўтказиш имкониятини кўриб чиқаётганини айтганди. У платформани 30 миллиард доллардан юқори баҳолашаётганини айтганди. Дуров ўшанда, “Telegram бу йил бўлмаса, кейинги йилда фойда келтира бошлашига умид қилмоқдамиз”, деб таъкидлаган. Платформа 2026 йилда фонд бозорига чиқиши кутилмоқда.
2023 йилда Telegram рақамли активларининг умумий қиймати деярли 400 миллион долларни ташкил этган бўлса, 2024 йилда компания Toncoinъни тахминан 244 миллион долларга сотди.
Францияда Павел Дуровга нисбатан бошланган тергов Telegram’нинг яқин икки йил ичида IPO ўтказиш режаларини барбод қилиши мумкин, чунки инвесторлар ва реклама берувчилар платформага сармоя киритишни хоҳламайди, деб ёзади FТ экспертларга таяниб.
Дуровнинг ҳибсга олиниши ва озод қилиниш шарти
Telegram асосчиси 24 август куни Озарбайжондан Парижга шахсий самолётида борганда Ле Бурже аэропортида қўлга олинди. У француз ҳуқуқ-тартибот идоралари ходимлари билан Telegram’да кибер ва молиявий жиноятлар масалаларида ҳамкорлик қилишдан бош тортганликда айбланди.
Париж суди уни платформага алоқадор аввал эълон қилинган 12 та ҳуқуқбузарликдан 6 тасида, жумладан, ҳукумат билан ҳамкорлик қилишдан бош тортишда, болалар порнографиясини тарқатишда, наркотрафикда иштирок этишда, шунингдек, уюшган гуруҳ таркибидаги фирибгарликда айблади. 29 август куни у 5 миллион евро миқдорида гаров тўлаш, ҳафтада икки марта полиция участкасига келиш, Францияни тарк этмаслик шарти билан озод қилинди.
Изоҳ (0)