Fransiya prezidenti Emmanuel Makron 2018-yil tushlik payti Telegram asoschisi Pavel Durovga kompaniyaning shtab-kvartirasini Parijga ko‘chirishni taklif qilgan. Bu haqda manbalarga tayanib, The Wall Street Journal xabar berdi.
O‘shanda Durov Fransiya prezidentiga rad javobini bergan. Makron o‘sha suhbatda Telegram shtab-kvartirasini ko‘chirishdan tashqari, Durovga fuqarolik berish masalasini ham muhokama qilgani aytilmoqda.
2017-yilda, ya’ni Makron va Durov uchrashuvidan bir yil oldin, Fransiya maxsus xizmatlari Arab Amirliklari bilan hamkorlikda Purple Music nomi ostida operatsiya o‘tkazgan, uning davomida Telegram asoschisi iPhone’iga buzib kirilgan, deb yozmoqda WSJ.
O‘sha paytda Fransiya hukumati ISHID Durov asos solgan messenjerdan o‘z saflariga a’zo yollash va hujumlarni rejalashtirish uchun foydalanishi mumkinligidan tashvishda bo‘lgan.
WSJ manbalariga ko‘ra, Telegram uzoq vaqt davomida kompaniyaning elektron pochtasiga Fransiyadan kelgan sud chaqiruvlari va qarorlarini e’tiborsiz qoldirgan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Durovning hibsga olinishi
Telegram asoschisi 24-avgust kuni Ozarbayjondan Parijga shaxsiy samolyotida borganda Le Burje aeroportida qo‘lga olingani xabar berilgandi. U fransuz huquq-tartibot idoralari xodimlari bilan Telegram’da kiber va moliyaviy jinoyatlar masalalarida hamkorlik qilishdan bosh tortganlikda ayblanmoqda. Fransiya politsiyasi vakiliga ko‘ra, Durov hozirda milliy kiberjinoyatchilik va firibgarlikka qarshi kurash boshqarmasi tomonidan tergov qilinmoqda. Messenjer asoschisi hamon hibsda saqlanmoqda.
Telegram kompaniyasi munosabati
Kompaniyaning ta’kidlashicha, Telegram “Yevropa Ittifoqi qonunlariga to‘liq rioya qiladi”, kontentni moderatsiya qilish esa “soha standartlariga mos kelib, doimiy ravishda takomillashtirilmoqda”. Shuningdek, kompaniya bosh direktorining “yashirish uchun hech narsasi yo‘qligi va u muntazam ravishda Yevropa bo‘ylab sayohat qilishi” aytilgan.
Durov yoki platforma Telegram foydalanuvchilarning suiiste’molliklari uchun javobgar ekani haqidagi da’volarni Telegram jamoasi “absurd” deb atagan.
“Butun dunyo bo‘ylab qariyb bir milliard foydalanuvchi Telegramni aloqa vositasi va muhim ma’lumotlar manbai sifatida ishlatadi. Biz ushbu vaziyatning tez orada hal etilishini kutmoqdamiz. Telegram har doim siz bilan”, deyiladi munosabatda
Fransiya prezidenti nima demoqda?
“Pavel Durov hibsga olinganidan keyin Fransiya haqidagi yolg‘on ma’lumotlarni o‘qiyapman. Fransiya so‘z va muloqot erkinligi, innovatsiyalar va tadbirkorlikka sodiqdir. Telegram rahbarining Fransiya hududida hibsga olinishi davom etayotgan sud tergovi doirasida amalga oshirildi”, dedi Makron X ijtimoiy tarmog‘idagi sahifasida.
Ma’lumot o‘rnida, Telegram asoschisi Rossiyadan tashqari, Sent-Kits va Nevis, BAA va Fransiya fuqaroligiga ega. Amirliklar va Rossiya Tashqi ishlar vazirligi Fransiyani ularning ham fuqarosi hisoblangan Durovga konsullik xizmatini taqdim etishni so‘ragan.
Izoh (0)