Surxondaryo viloyati hokimi Ulug‘bek Qosimov Koreya xalqaro hamkorlik agentligi (KOICA) loyiha menejeri Kim Chon Bin va loyiha ijrochisi, sotib oluvchi “BJ Agro” korxonasi ijrochi direktorini qabul qildi. Bu haqda viloyat hokimligi matbuot xizmati xabar berdi.
Maʼlum qilinishicha, uchrashuvda Surxondaryo viloyati Oltinsoy tumani va Koreyaning Damyang tumani o‘rtasida qishloq xo‘jaligi mahsulotlari yetishtirish borasida hamkorlik, xususan, tumanda 6 mln dollarlik loyihani amalga oshirishga investisiya kiritish, loyiha doirasida 250 nafar yoshni Koreyaga mavsumiy ishga yuborish, brokkoli karami yetishtirishni yo‘lga qo‘yish, 100 nafar oltinsoylik fermerlarni Koreyada o‘qitish masalalari muhokama qilingan.
Loyihani tomonlar mutasaddilari ishtirokida joyida ko‘rib, texnik va iqtisodiy tomonlarini puxta ishlab chiqishga kelishib olingan.
Avvalroq kambag‘allikni qisqartirish va bandlik vaziri Behzod Musayev Koreya adliya vaziri Pak Son Je bilan uchrashuvda o‘zbekistonliklar Koreyaga mavsumiy ishlarga yuborilishi bo‘yicha kelishuvga erishgani haqida xabar berilgandi.
Izoh (0)