“Gazprom” 2024-yilning yanvar—avgust oylarida Markaziy Osiyoga gaz yetkazib berishni ikki baravar oshirdi. Bu haqda kompaniya rahbari Aleksey Millerga tayanib, “TASS” xabar berdi.
“Ushbu respublikalar iqtisodiy va ijtimoiy jihatdan juda jadal rivojlanmoqda. Bu esa bizga yangi imkoniyatlar ochmoqda. Birgina yanvar—avgust oylarida, sakkiz oy ichida, ushbu mintaqaga gaz yetkazib berishni ikki baravarga oshirdik”, dedi Miller.
U Markaziy Osiyo mamlakatlarida energiya resurslari iste’moli juda yuqori sur’atlar bilan o‘sayotgani, O‘zbekistonga gaz yetkazib berish hozirda maksimal darajada ketayotganini aytdi.
Masalan, hozirgi paytda O‘zbekistonga gaz yetkazib berish uchun biz qondirayotgan buyurtmalar “Markaziy Osiyo — Markaz” gaz quvuri orqali texnik jihatdan mumkin bo‘lgan maksimal darajada amalga oshirilmoqda. Bu qishki darajada bo‘lib, o‘tgan qishda O‘zbekistonda anomal kuchli sovuq bo‘lganda, biz u yerga gaz yetkazib bergan darajaga teng, dedi Miller.
Qirg‘iziston haqida gapirar ekan, Miller mamlakatda gazlashtirish darajasi ikki baravar oshgani, “Gazprom Qirg‘iziston”ning natijalarini “juda yaxshi” ekanini aytdi.
Qirg‘izistonning gaz transport tizimini rekonstruksiya qilish bo‘yicha ulkan ishlar amalga oshirildi. Yangi gaz uzatish inshootlari barpo etildi. Ammo shuni ham ta’kidlash joizki, “Gazprom Qirg‘iziston” kompaniyasi “Gazprom”da odat tusiga kirganidek, Qirg‘izistonda ijtimoiy ahamiyatga molik loyihalarni ham amalga oshirdi, dedi u.
“Gazprom” rahbari Qirg‘izistonda gaz iste’moli o‘sishda davom etayotganini aytdi.
- Iyun oyida “Gazprom” Qirg‘izistonga gaz yetkazib berish, shuningdek, Qozog‘iston bilan 2025—2040-yillar davomida O‘zbekiston va Qirg‘izistonga Rossiya gazining tranziti bo‘yicha bitimlar imzoladi.
- Tranzitni ta’minlash uchun “Markaziy Osiyo — Markaz” magistral gaz quvurlari tizimi negizida maxsus ajratilgan yo‘nalish kengaytiriladi, shuningdek, Qozog‘istonning gaz uzatish quvvatlarini rivojlantirish bo‘yicha boshqa loyihalar amalga oshiriladi.
2023-yil iyun oyida O‘zbekiston “Gazprom” bilan gaz sotib olish bo‘yicha ikki yillik shartnoma tuzdi, kunlik yetkazib berish hajmi 9 million kub metrni, yillik hajmi esa qariyb 2,8 milliard kub metrni tashkil etadi. Ushbu shartnoma bo‘yicha yetkazib berish 2023-yil 7-oktyabrda boshlangan.
Izoh (0)