“Gazprom” kompaniyasi moliyaviy inqirozga yuz tutishini prognoz qilgan Davlat dumasi deputati Pavel Zavalniy Energetika qo‘mitasi raisi lavozimidan ozod etildi. Bu haqda The Moscow Time xabar berdi.
Rossiyada hukumat tarkibi o‘zgargandan so‘ng boshlangan va Sergey Neverovni vitse-spiker lavozimiga olib kelgan Davlat dumasi rahbariyatidagi o‘zgarishlar to‘lqini Energetika qo‘mitasiga yetib bordi. 23-iyul kuni “Yagona Rossiya” a’zosi Pavel Zavaliy Energetika qo‘mitasi raisi lavozimidan chetlashtirildi.
Gaz sohasida qariyb 30 yil ishlab, kompressor stansiyasi muhandisidan “Gazprom” sho‘ba korxonalarining top-menejerigacha bo‘lgan yo‘lni bosib o‘tgan Zavalniy 2015-yildan buyon qo‘mitaga rahbarlik qilgan. Bundan avval esa Rossiya gaz jamiyatini boshqargan. Uning ishdan bo‘shatish sabablari Dumada aytilmagan.
2023-yil Zavalniy Yevropadagi asosiy eksport bozorini yo‘qotgan va 1980-yillarning o‘rtalaridan boshlab xorijda gaz sotishni minimal darajaga tushirgan “Gazprom”ning yirik moliyaviy muammolari haqida bayonot bergandi.
“Gaz eksporti tushumlari va gazlashtirish majburiyatlari kamayishi tufayli ‘Gazprom’ning zararlari 2025-yilga kelib 1 trln rublga yetishi mumkin. Eksport bo‘lmaydi, xarajatlar esa qoldi”, — degan Zavalniy.
O‘tgan yil yakunlariga ko‘ra, “Gazprom” chorak asr ichida birinchi marta yillik sof zarar ko‘rdi va uning hajmi kompaniya mavjud bo‘lgan o‘ttiz yil ichida rekord darajada — 629 milliard rublga yetdi.
2019-yilda Zavalniy Rossiyada arzon neft qazib olinadigan konlar tugab borayotgani, zaxiralar tannarxi sezilarli darajada qimmatlashayotgani, bundan tashqari, uglevodorodlarga — Rossiya eksportining asosiy tovarlariga bo‘lgan talab doimiy bo‘lmasligini aytib ogohlantirdi.
Izoh (0)