Indoneziya pornografiya va qimor o‘yinlarini reklama qilish ehtimoli tufayli mamlakatda Telegram va Bigo Live striming ilovasini bloklamoqchi. Bu haqda Jakarta Globe xabar berdi.
Mamlakat kommunikatsiya va axborot vaziri Bo‘ri Ari Setiadining so‘zlariga ko‘ra, vazirlik allaqachon ikkala platformaga ham jiddiy ogohlantirishlar bergan. Biroq vazir Telegram va Bigo Live “adekvat” javob bermaganini aytgan.
“Men zudlik bilan Bigo Live va Telegram’ni yopishni afzal ko‘rgan bo‘lardim, lekin avval jamoa qo‘shimcha tadqiqotlar o‘tkazishi kerak. Biz jamoamiz to‘plagan dalillar asosida harakat qilyapmiz. Agar pornografiya yoki qimor reklamalari mavjudligini aniqlasak, platformalarni bloklashni boshlaymiz”, dedi u.
Vazirning aytishicha, Telegram va Bigo Live’ning oldingi javoblariga qaramasdan, kontent moderatsiyasi va muammolarni hal qilish bo‘yicha va’da qilingan o‘zgartirishlar hanuzgacha amalga oshirilmagan. Indoneziya aloqa va axborot vazirining bayonoti Telegram asoschisi Pavel Durov bilan bog‘liq vaziyat fonida yangradi.
Durovning hibsga olinishi va ozod qilinish sharti
Telegram asoschisi 24-avgust kuni Ozarbayjondan Parijga shaxsiy samolyotida borganda Le Burje aeroportida qo‘lga olindi. U fransuz huquq-tartibot idoralari xodimlari bilan Telegram’da kiber va moliyaviy jinoyatlar masalalarida hamkorlik qilishdan bosh tortganlikda ayblandi.
Parij sudi uni platformaga aloqador avval e’lon qilingan 12 ta huquqbuzarlikdan 6 tasida, jumladan, hukumat bilan hamkorlik qilishdan bosh tortishda, bolalar pornografiyasini tarqatishda, narkotrafikda ishtirok etishda, shuningdek, uyushgan guruh tarkibidagi firibgarlikda aybladi. 29-avgust kuni u 5 million yevro miqdorida garov to‘lash, haftada ikki marta politsiya uchastkasiga kelish, Fransiyani tark etmaslik sharti bilan ozod qilindi.
Izoh (0)