Индонезия порнография ва қимор ўйинларини реклама қилиш эҳтимоли туфайли мамлакатда Telegram ва Bigo Live стриминг иловасини блокламоқчи. Бу ҳақда Jakarta Globe хабар берди.
Мамлакат коммуникация ва ахборот вазири Бўри Ари Сетиадининг сўзларига кўра, вазирлик аллақачон иккала платформага ҳам жиддий огоҳлантиришлар берган. Бироқ вазир Telegram ва Биго Ливе “адекват” жавоб бермаганини айтган.
“Мен зудлик билан Bigo Live ва Telegram’ни ёпишни афзал кўрган бўлардим, лекин аввал жамоа қўшимча тадқиқотлар ўтказиши керак. Биз жамоамиз тўплаган далиллар асосида ҳаракат қиляпмиз. Агар порнография ёки қимор рекламалари мавжудлигини аниқласак, платформаларни блоклашни бошлаймиз”, деди у.
Вазирнинг айтишича, Telegram ва Bigo Live’нинг олдинги жавобларига қарамасдан, контент модерацияси ва муаммоларни ҳал қилиш бўйича ваъда қилинган ўзгартиришлар ҳанузгача амалга оширилмаган. Индонезия алоқа ва ахборот вазирининг баёноти Telegram асосчиси Павел Дуров билан боғлиқ вазият фонида янгради.
Дуровнинг ҳибсга олиниши ва озод қилиниш шарти
Telegram асосчиси 24 август куни Озарбайжондан Парижга шахсий самолётида борганда Ле Бурже аэропортида қўлга олинди. У француз ҳуқуқ-тартибот идоралари ходимлари билан Telegram’да кибер ва молиявий жиноятлар масалаларида ҳамкорлик қилишдан бош тортганликда айбланди.
Париж суди уни платформага алоқадор аввал эълон қилинган 12 та ҳуқуқбузарликдан 6 тасида, жумладан, ҳукумат билан ҳамкорлик қилишдан бош тортишда, болалар порнографиясини тарқатишда, наркотрафикда иштирок этишда, шунингдек, уюшган гуруҳ таркибидаги фирибгарликда айблади. 29 август куни у 5 миллион евро миқдорида гаров тўлаш, ҳафтада икки марта полиция участкасига келиш, Францияни тарк этмаслик шарти билан озод қилинди.
Изоҳ (0)