Yevropa Ittifoqi diplomatiyasi rahbari Jozep Borrel Isroil moliya vaziri Betsalel Smotrich va milliy xavfsizlik vaziri Itamar Ben-Gvirga “nafrat uyg‘otgani” va “inson huquqlarini buzgani” uchun sanksiyalar kiritishni taklif qildi. Bu haqda Deutsche Welle xabar berdi.
Borrelning taklifi Yevropa Ittifoqining 27 mamlakati tashqi ishlar vazirlari sammiti arafasida aytilgan. Smotrich va Ben-Gvir G‘azo sektori aholisiga insonparvarlik yordami yetkazib berishni to‘xtatishga chaqirgandi. Ben-Gvir shu yo‘l bilan HAMASni taslim bo‘lishga undashni mo‘ljallagan. Smotrich esa Falastin harakati isroillik garovga olinganlarni ozod qiladi, deb umid qilgan.
Isroil moliya vaziri G‘azo sektorining bunday blokadasini, hatto uning ikki million aholisi ochlikdan halok bo‘lsa ham, “asosli” deb atagan.
Jozep Borrel Isroil vazirlariga qarshi joriy etishni taklif etayotgan sanksiyalar ularning Yevropa Ittifoqidagi aktivlarini muzlatish va Yevropa Ittifoqiga kirishni taqiqlashni nazarda tutadi.
Avvalroq Smotrich va Ben-Gvir HAMAS bilan potensial yarashishga qat’iyan qarshi ekani ma’lum bo‘lgandi. Shuningdek, milliy xavfsizlik vaziri Al-Aqso majmuasida yahudiy sinagogasini qurishni ilgari surib, majmuada yahudiylarning ibodat qilishiga ham ruxsat berishga chaqirgandi.
Izoh (0)