“Халқимизнинг чинакам қаҳрамонлари”. Президент Олимпиадада ўзбекистонликлар эришган рекорд натижаларни санаб ўтди

Париж Олимпиадаси Ўзбекистон учун том маънода рекордлар, мислсиз ютуқларга бой бўлди. Бу ҳақда Шавкат Мирзиёев 28 август куни Кўксаройда спортчилар, уларнинг ота-оналари ва мураббийлари билан учрашувда айтиб ўтди.

“Аввало, мазкур Олимпиадада Ўзбекистон биринчи марта энг кўп таркиб билан, яъни, 19 та спорт тури бўйича 90 нафар спортчи билан иштирок этганини таъкидлаш лозим. Айниқса, аёллар кураши, камондан ўқ отиш, сувга сакраш, футбол каби спорт турлари бўйича спортчиларимиз илк бор Олимпия ўйинларида қатнашганини алоҳида эътироф этиш керак”, деди президент.

Учрашувда давлат раҳбари Олимпиада ўйинларида ўзбекистонлик спортчилар қўлга киритгани рекорд натижаларни санаб ўтди.

“Масалан, дзюдо бўйича бизда илгари олтин медал бўлмаган эди. Бу сафар матонатли дзюдочи қизимиз Диёра Келдиёрова томонидан ушбу марра забт этилди. Олимпия ўйинлари тарихида ўзбекистонлик аёллар ўртасида биринчи марта олтин медални қўлга киритди. Шу тариқа Диёра яна бир рекорд ўрнатди.

Яна бир жасур қизимиз – Светлана Осипова эса, таэквондо бўйича биринчи кумуш медални эгаллаб, мамлакатимиз аёллар спорти тарихида янги саҳифа очди. Шу тариқа спортчи қизларимиз битта Олимпиадада илк бор 2 та медални қўлга киритиб, янги рекорд ўрнатишга эришдилар”, — деди президент.

Шавкат Мирзиёев Ўзбекистон таэквондо бўйича биринчи марта Олимпия ўйинларида 2 та медални қўлга киритганини қайд этди.

“Моҳир спортчимиз Улуғбек Рашитов Олимпия ҳаракати солномасида таэквондо бўйича энг ёш тоифада икки карра Олимпия чемпиони бўлди. Шу пайтгача дунёда фақат 4 нафар спортчи шундай юксак шарафга сазовор бўлган эди. Улуғбек эса бешинчи бўлиб, уларнинг сафидан муносиб ва мустаҳкам жой эгаллади”, деди давлат раҳбари.

Президент у оёғидан қаттиқ жароҳат олганига қарамай, финал жангида кучли рақибга қарши мардона жанг қилиб, ғолиб қаҳрамонга айланганини таъкидлаб ўтди.

Бокс бўйича ҳам миллий терма жамоа олтин медаллар сони бўйича Ўзбекистон тарихида Олимпия ўйинлари рекордини янгилади ва умумжамоа ҳисобида 1-ўринни эгаллади. Эркаклар ўртасида еттита олтин медалнинг бештасини ёки 71 фоизини ўзбекистонлик боксчилар қўлга киритди. Фурсатдан фойдаланиб, президент боксчилар — Баҳодир Жалолов, Ҳасанбой Дўсматов, Асадхўжа Мўйдинхўжаев, Лазизбек Муллажонов, Абдумалик Халоқовни шундай ютуқлари билан яна бир бор табриклади.

Эркин кураш бўйича 12 йиллик танаффусдан сўнг яна Олимпиада олтин медали қўлга киритилгани ҳам тарихий ютуқ бўлгани таъкидланди. Шу муносабат билан давлат раҳбари моҳир курашчи Разамбек Жамаловни ҳам табриклаб, унга янги зафарлар тилади.

Мамлакати жамоаси эришган ютуқларда кумуш медал соҳиби — оғир атлетикачи Акбар Жўраев, бронза медал совриндорлари – эркин курашчи Ғуломжон Абдуллаев, тажрибали дзюдочилар  Музаффарбек Тўрабоев, Алишер Юсупов ҳам ҳиссаси катта бўлгани эътироф этилди.

“Янги Ўзбекистоннинг бугунги тараққиётига албатта мана шундай улкан ғалабалар ярашади. Шу маънода, сизлар Парижда эришган натижаларингиз билан ўз номингизни миллий спортимиз тарихига олтин ҳарфлар билан муҳрлаб қўйдингиз”, деди Шавкат Мирзиёев.

Президент ушбу ютуқларда устоз-мураббийлар, мутахассис ва мутасаддилар, омад тилаб турган бутун халқ ҳиссаси беқиёс эканини таъкидлади.