Qirg‘iziston futbolchisi ukrainalik futbolchining jag‘ini sindirgani uchun 5 yilga diskvalifikatsiya qilindi

Qirg‘iziston terma jamoasi futbolchisi Mirbek Axmataliyev “Muras Yunayted” (Jalolobod) jamoasidagi sherigi bilan jang qilgani uchun besh yilga diskvalifikatsiya qilindi. Bu haqda AKIpress Qirg‘iziston futbol ittifoqiga (KFU) tayanib xabar bermoqda.

Mushtlashuv 15-avgust kuni jamoaning Bishkekdagi mashg‘ulotlarida bo‘lib o‘tgan va oqibatda ukrainalik yarim himoyachi Yevgeniy Terzi jarohat olgan.

Klub janjalning sababchisi sifatida topilgan Axmataliyev bilan mehnat munosabatlarini to‘xtatdi va KFU tartib-intizom qo‘mitasi uni besh yilga futboldan chetlatdi.

“Muras Yunayted” klubi, shuningdek, murabbiylar shtabi va sport direktorini ham ishdan bo‘shatdi.

Transermarkt ma'lumotlariga ko‘ra, 30 yoshli Axmataliyev 2016-yildan buyon milliy terma jamoa safida 7 ta o‘yin o‘tkazgan.

Ma’lumot uchun, 2023-yilning dekabridan 2024-yilning iyunigacha “Muras Yunayted”ni rossiyalik murabbiy Andrey Kanchelskis boshqargan.