Қирғизистон терма жамоаси футболчиси Мирбек Ахматалиев “Мурас Юнайтед” (Жалолобод) жамоасидаги шериги билан жанг қилгани учун беш йилга дисквалификация қилинди. Бу ҳақда AKIpress Қирғизистон футбол иттифоқига (KFU) таяниб хабар бермоқда.
Муштлашув 15 август куни жамоанинг Бишкекдаги машғулотларида бўлиб ўтган ва оқибатда украиналик ярим ҳимоячи Евгений Терзи жароҳат олган.
Клуб жанжалнинг сабабчиси сифатида топилган Ахматалиев билан меҳнат муносабатларини тўхтатди ва KFU тартиб-интизом қўмитаси уни беш йилга футболдан четлатди.
“Мурас Юнайтед” клуби, шунингдек, мураббийлар штаби ва спорт директорини ҳам ишдан бўшатди.
Трансермаркт маълумотларига кўра, 30 ёшли Ахматалиев 2016 йилдан буён миллий терма жамоа сафида 7 та ўйин ўтказган.
Маълумот учун, 2023 йилнинг декабридан 2024 йилнинг июнигача “Мурас Юнайтед”ни россиялик мураббий Андрей Канчельскис бошқарган.
Изоҳ (0)