Buyuk Britaniya hukumati 22 milliard funt sterlinglik davlat byudjetida jiddiy iqtisodiy va ijtimoiy muammolarning “meros”i bo‘lgan “qora tuynuklar”ni aniqladi. Bu haqda mamlakat bosh vaziri Kir Starmer xabar berdi.
![](/static/2024/08/27/photo_2024-08-27_21-41-16-_N1zIuXo.jpg)
Uning so‘zlariga ko‘ra, oxirgi uch oyda hukumat qarzi 5 milliard funt sterlingga oshgan. Starmerning ta’kidlashicha, mamlakatdagi tartibsizliklar so‘nggi o‘n yilliklardagi muvaffaqiyatsiz siyosatlar natijasi bo‘lgan vandalizm, irqchilik va zo‘ravonlik kabi jamiyatdagi jiddiy muammolarni aniqlagan.
Natijada, bosh vazir oktyabr oyida “og‘riqli” byudjet taqdim etilishi haqida ogohlantirgan. U soliq yukini mamlakat fuqarolari va rezidentlari o‘rtasida adolatli taqsimlash zarurligini ta’kidlagan.
Starmerning qo‘shimcha qilishicha, mamlakat oson yechimlar siyosatiga chek qo‘yib, xatolarni tuzatishga, jumladan, yangi qamoqxonalar qurishga e’tibor qaratishi kerak.
Avvalroq Buyuk Britaniyada musulmonlarga qarshi namoyish uyushtirgan fuqarolar harakati politsiya ishtirokidagi ommaviy to‘qnashuvlarga aylanib ketgani xabar berilgan edi.
Manbada aytilishicha, keskinlik 29-iyul kuni Sautport shahrida yuz bergan qotillik oqibatida kelib chiqqan. O‘shanda shaharchada o‘tkazilgan konsert paytida nomaʼlum o‘spirin jinoyat sodir etib, uch nafar bolani pichoqlab o‘ldirgan, yana besh nafar bola og‘ir jarohat bilan kasalxonaga olib ketilgan.
Sautport aholisi qotillikda musulmon jamoasidan gumon qilgan. O‘ldirilgan bolalarning qarindoshlari hamda ularga qo‘shilganlar ishtirokidagi norozilik harakatlari tartibsizliklarga aylanib ketgan.
Izoh (0)